বলীউদত খোজ দিয়াৰ প্ৰস্তুতি সম্পূৰ্ণ হৈ উঠিছে ভাৰতীয় ক্ৰিকেট দলৰ প্ৰাক্তন অধিনায়ক তথা বিস্ফোৰক বেটছমেন মহেন্দ্ৰ সিং ধোনীৰ।
মহেন্দ্ৰ সিং ধোনীৰ এই নতুন ভূমিকাক লৈ ইন্টাৰনেট জগতত সৰৱ চৰ্চা চলিছে।
ক্ৰিকেট বিশ্বৰ পৰা যিকোনো সময়তে অৱসৰ গ্ৰহণৰ ঘোষণা কৰিব পাৰে ধোনীয়ে। ইতিমধ্যে ধোনীক কেতিয়াবা ফুটবলাৰ, কেতিয়াবা টেনিছ খেলুৱৈ বা সেনা জোৱানৰ ভূমিকাত দেখা গৈছে।
পিচে, এইবাৰ এই সকলো অতিক্ৰমি বলীউদত ভুমুকি মৰাৰ বাবে সাজু হৈছে অভিলেখ সৃষ্টিকাৰী উইকেটকীপাৰ-বেটছমেনগৰাকী।
ধোনীৰ জীৱনক লৈ পূৰ্বে চলচ্চিত্ৰ নিৰ্মাণো হৈছে। কিন্তু এইবাৰ চলচ্চিত্ৰত ধোনীয়ে অভিনয় কৰাৰ বাবে সাজু হোৱাৰ খবৰ ওলাইছে।
দেশক বিশ্বকাপ বিজয়ৰ সোৱাদ দিয়া প্ৰাক্তন অধিনায়কগৰাকী শেহতীয়া এক সমীক্ষাত ভাৰতৰ জনপ্ৰিয় ব্যক্তিৰ তালিকাত শীৰ্ষৰ দ্বিতীয় স্থানত আছে।
ক্ৰিকেট জগতৰ নায়কগৰাকী এইবাৰ অভিনেতা হিচাপে অৱতীৰ্ণ হোৱাৰ বাবে আগবাঢ়িছে। বলীউদৰ এখন চৰ্চিত চলচিত্ৰত অভিনয়ৰ প্ৰস্তাৱ লাভ কৰিছে মহেন্দ্ৰ সিং ধোনীয়ে।
ধোনীয়ে অভিনয় কৰিবলগীয়া চলচ্চিত্ৰখনৰ নাম হৈছে ‘ডগ হাউছ’। চলচ্চিত্ৰখনৰ মূল ভূমিকাত থাকিব সঞ্জয় দত্ত। ছবিখনত সুনীল ছেট্টী আৰু ইমৰাণ হাছমী তথা মাধৱনেও অভিনয় কৰাৰ সম্ভাৱনা আছে।
আনহাতে, ছবিখনত আন এটা গুৰুত্বপূৰ্ণ চৰিত্ৰত অভিনয় কৰিব ‘পদ্মাৱত’ আৰু ‘সঞ্জু’ খ্যাত জিম চাৰ্ভেক। ছবিৰ পৰিচালনা সমীৰ কৰ্ণিক। অহা বছৰ ছবিখনৰ শ্বুটিং আৰম্ভ কৰা হ’ব।
বৰ্তমান ধোনীয়ে ক্ৰিকেটৰ পৰা ছুটী লৈ ৰাঁচীত পৰিয়ালৰ সৈতে সময় কটাইছে। তদুপৰি, টেনিছ খেলি ফিটনেছ অটুট ৰখাৰ চেষ্টা কৰিছে মাহীয়ে।
ইয়াৰ পূৰ্বে ধোনীয়ে বহু বিজ্ঞাপনত অংশ লৈছে যদিও এইবাৰ প্ৰথম চলচ্চিত্ৰত অভিনয় কৰিবলৈ আগবাঢ়িছে।
