পাকিস্তানত সন্ত্ৰাসবাদ দমনৰ ক্ষেত্ৰত লোৱা দেশখনৰ ভূমিকা সন্দৰ্ভত ভাৰতে ইতিমধ্যে আন্তৰ্জাতিক মঞ্চত অভিযোগ কৰি আহিছে। কিন্তু ইয়াৰ সুফল একো দেখা যোৱা নাই।
পাকিস্তানে বিষয়টোক কেতিয়াও গুৰুত্বসহকাৰে লোৱা নাই। পাকিস্তানৰ ভূমিত এতিয়াও সন্ত্ৰাসবাদীৰ দপদপনি অব্যাহত আছে।
বিশ্বত শান্তিৰ বাৰ্তা বিলাই ফুৰা পাকিস্তানৰ প্ৰধান মন্ত্ৰীক এইবাৰ কটাক্ষ কৰিছে ভাৰতৰ প্ৰতিৰক্ষা মন্ত্ৰী ৰাজনাথ সিঙে। বিদ্ৰুপভৰা বক্তৱ্যৰে সিঙে কৈছে যে পাকিস্তানে বিচাৰিলে ভাৰতে পাকিস্তানত সেনা পঠাব পাৰে।
হাৰিয়ানাত বিধানসভাৰ নিৰ্বাচনী প্ৰচাৰৰ বাবে যোৱা ৰাজনাথ সিঙে দেওবাৰে এখন নিৰ্বাচনী সভাত ভাষণ দি কয়,’’মই পাকিস্তানক এটা পৰামৰ্শ দিব বিচাৰো। আপোনালোকে যদি প্ৰকৃততে সন্ত্ৰাসবাদ দমনৰ বাবে ইচ্ছুক, তেতিয়াহ’লে আমি আপোনালোকক সহায় কৰিবলৈ সাজু আছো।‘’
তেওঁ কয়,’’আপোনালোকে যদি আমাৰ সেনা সাহায্য বিচাৰে তেতিয়াহ’লে সাহায্যৰ বাবে সেনাও পঠাব পাৰো।‘’
অৱশ্যে, সাহায্যৰ আশ্বাস দিয়াৰ সমান্তৰালভাৱে প্ৰতিৰক্ষা মন্ত্ৰী সিঙে সাৱধান বাণীও শুনায়। তেওঁ স্পষ্ট কৰি দিয়ে যে পাকিস্তানে যদি সন্ত্ৰাসবাদক সহায় কৰা বন্ধ নকৰে, তেনেহ’লে ভাৰত আৰু অধিক বিপদজনক হৈ উঠিব পাৰে।
তদুপৰি, ইমৰাণ খানক উদ্দেশ্যি ৰাজনাথ সিঙে কয়,’’আপোনালোকে দ্বিজাতি তত্ত্বৰ ভিত্তিত ১৯৪৭ চনত দেশ ভাগ কৰিছিল। ১৯৭১ চনত আপোনালোকৰ দেশ দুভাগত বিভক্ত হৈ গৈছে। ভৱিষ্যতে যদি এনে কোনো পদক্ষেপ গ্ৰহণ কৰে, তেনেহ’লে আপোনালোকৰ দেশ আৰু ভাঙিব।‘’
সিঙে লগতে কয়,’’ৰাষ্ট্ৰসংঘত ইমৰাণ খানে কৈছে যে কাশ্মীৰীসকলে স্বাধীনতা নোপোৱা পৰ্যন্ত আমি যুঁজ দিম। আন্তৰ্জাতিক মঞ্চত অভিযোগ কৰিম। মই ,স্পষ্ট কৰি দিব বিচাৰো, ভাৰতে কাৰো ওচৰত মূৰ নোদোৱায়। ভাৰতক কোনোও হেচা দিব নোৱাৰে।‘’
