ভিলেজ ৰকষ্টাৰ আৰু বুলবুল ক্যান চিং চলচ্চিত্ৰ দুখনেৰে অসমৰ লগতে সমগ্ৰ বিশ্বত চলচ্চিত্ৰ নিৰ্মাতা হিচাপে খ্যাতি লাভ কৰা অসমৰ পৰিচালক ৰীমা দাসৰ চুটি ছবি ‘নাইবাৰ’ চীনৰ পিংয়াও আন্তঃৰাষ্ট্ৰীয় চলচ্চিত্ৰ মহোৎসৱত ১৭ অক্টোবৰত প্ৰদৰ্শিত হয়।
ব্ৰিকছ (ব্ৰাজিল,ৰাছিয়া,ভাৰত,দক্ষিণ আফ্ৰিকা আৰু চীন)ৰ ‘ফৰ ইটছ আডাৰ’ সংকলনৰ অন্যতম ভাৰতীয় চুটি ছবি হ’ল নাইবাৰ।
মহোৎসৱখনিত ভাৰতৰ হৈ প্ৰতিনিধিত্ব কৰিবলৈ সুযোগ লাভ কৰা পৰিচালক ৰীমা দাসে চুটি ছবিখনৰ কিছু অংশ অসমৰ পটভূমিত নিৰ্মাণ কৰিছিল।
চলচ্চিত্ৰ মহোৎসৱখনিত চুটি ছবিখন প্ৰদৰ্শিত হোৱাৰ পাছতে অসমীয়া পৰিচালকগৰাকীয়ে ফেইচবুকৰ মাধ্যমেৰে নিজৰ সন্তুষ্টি প্ৰকাশ কৰে।
‘‘মই অন্যান্য দেশৰ সতীৰ্থসকলৰ সৈতে মোৰ চলচ্চিত্ৰখন প্ৰদৰ্শন কৰিবলৈ পাই অতিকৈ সুখী অনুভৱ কৰিছো,’’ ৰীমা দাসে ফেইচবুকত লিখে।
তদুপৰি, জিয়া জাংকেক সহকাৰী প্ৰযোজক হিচাপে লাভ কৰাৰ বাবে সন্তোষ ব্যক্ত কৰে ৰীমা দাসে।
