পথ-যোগাযোগ ব্যৱস্থাৰ ক্ষেত্ৰত দীৰ্ঘদিন ধৰি অৱহেলিত হৈ অহা মাজুলীৰ দক্ষিণ আহতগুৰি ৰাইজে যাতায়াতৰ বাবে জীয়াতু ভোগ কৰি আহিবলগা হৈছে।
আজি ভেকেলি চাপৰিৰ মধুস্মিতা মিলি পেগু নামৰ এগৰাকী প্ৰসূতিক ঘোৰা গাড়ীত উঠাই দুজন মানুহে টানি টানি আঠ কি. মি. পথ তাৰ পিছত নাৱেৰে দূৰৰ চিকিৎসালয়লৈ আনিবলগা হোৱা ঘটনাই অঞ্চলটোৰ ৰাইজক ক্ষোভিত কৰি তুলিছে।
উল্লেখযোগ্য যে আহতগুৰি ভেকেলি চাপৰিৰ অঞ্চলটো শিক্ষা, চিকিৎসা, ব্যৱসায় বাণিজ্যকে ধৰি প্ৰায় সকলো ক্ষেত্ৰত অঞ্চলটোৰ লোকসকল বছৰ বছৰ ধৰি সন্মুখীন হৈ আহিছে অভাৱনীয় সমস্যাৰ।
তাৰোপৰি যাতায়াত ব্যৱস্থাৰ কদৰ্যময় ৰূপটোৰ বাবে অঞ্চলটোৰ ৰোগী সকল চিকিৎসালয়লৈ অহাৰ সময়ত নানান হাৰাশাস্তিৰ সন্মুখীন হ’বলগীয়া হৈছে।
একবিংশ শতিকাৰ আধুনিক যোগাযোগ ব্যৱস্থাৰ সময়ত ঘোৰা গাড়ীত তুলি কলবাৰী ৰাজ্যিক চিকিৎসালয়লৈ অনা দৃশ্যই সভ্য সমাজক লজ্জিত কৰি তুলিছে। যোগাযোগ ব্যৱস্থাৰ নামত নৰক যন্ত্ৰণা।
বহু সময়ত পথৰ শোচনীয় অৱস্থাৰ বাবে সংঘটিত হৈছে কেইবাটাও ভয়ংকৰ পথ দুৰ্ঘটনা। আনহাতে অঞ্চলটোৰ যোগাযোগ ব্যৱস্থা উন্নত কৰাৰ বাবে স্থানীয় ৰাইজে চৰকাৰক দাবী জনাই অহাৰ পাছতো বৰ্তমানলৈকে কোনো ব্যৱস্থা গ্ৰহণ নকৰাৰ অভিযোগ উত্থাপন কৰিছে।
