অহা ৩ নবেম্বৰৰ পৰা ভাৰতে বাংলাদেশৰ বিৰুদ্ধে ঘৰৰ মাটিত তিনিখনীয়া টি-২০ শৃংখলাত অংশ লোৱাৰ কথা আছিল, কিন্তু এতিয়া শৃংখলাটো অনুষ্ঠিত হ’ব নে নহয় তাক লৈ সন্দেহৰ সৃষ্টি হৈছে।
সোমবাৰে বাংলাদেশৰ ছিনিয়ৰ ক্ৰিকেট দলৰ একাংশ ক্ৰিকেটাৰে ঢাকাত এক সংবাদমেলৰ জৰিয়তে ক্ৰিকেট ব’ৰ্ডত ধমক প্ৰদান কৰে। ব’ৰ্ডে ক্ৰিকেটাৰ সকলৰ ১১টা দাবী পূৰণ নকৰা পৰ্যন্ত তেওঁলোকে ক্ৰিকেট গতিবিধিৰ সৈতে জড়িত নহয় বুলি হুমকি দিছে।
ক্ৰিকেটাৰ সকলৰ এনে সিদ্ধান্ত তথা প্ৰতিবাদে এতিয়া সংকটত পেলাইছে ভাৰত-বাংলাদেশৰ ক্ৰিকেট শৃংখলা।
আজিৰ সংবাদমেলত চাকিব আল হাছান, মেহমুদুল্লাহ, মুছফিকুৰ ৰহিম আৰু তামিম ইকাবালৰ দৰে ক্ৰিকেটাৰে অংশ লোৱাৰ লগতে যথেষ্ট সংখ্যক ফাৰ্ষ্ট ক্লাছ ক্ৰিকেটাৰে তেওঁলোকক সমৰ্থন দিয়ে।
‘আমাৰ এই কাৰ্যসূচীত ১৯ অনূৰ্ধ্বৰ দলটোক সাঙুৰি লোৱা নাই কিয়নো তেওঁলোকে বিশ্বকাপৰ প্ৰস্তুতি চলাই আছে। ইয়াৰ বাহিৰে সকলো আমাৰ লগত আছে। যেতিয়ালৈ আমাৰ দাবী সমূহ পূৰণ কৰা নহয় তেতিয়ালৈ আমি ক্ৰিকেটত জড়িত নহও’। বৰ্তমান সময়ৰ বিশ্বৰ অন্যতম শ্ৰেষ্ঠ অল ৰাউণ্ডাৰ চাকিব আল হাছানৰ মন্তব্য।
ক্ৰিকেটাৰ সকলৰ এনে সিদ্ধান্তৰ বিষয়ে বাংলাদেশ ক্ৰিকেট ব’ৰ্ডৰ চি ই অ’ নিজামুদ্দিন চৌধুৰীয়ে কয়, ‘ক্ৰিকেটাৰ সকলৰ দাবী সমূহ ব’ৰ্ডৰ মজিয়াত আলোচনা কৰা হ’ব আৰু অতি শীঘ্ৰে সমস্যা সমূহ সমাধান কৰাৰ প্ৰয়াস কৰিম’।
বাংলাদেশ ক্ৰিকেটাৰ সকলৰ কেইটামান প্ৰধান দাবী তলত উল্লেখ কৰা হ’ল-
- শীঘ্ৰে কাৰ্যকৰী হোৱাকৈ ক্ৰিকেটাৰ্ছ ৱেলফেয়াৰ এছ’চিয়েশ্যন অব বাংলাদেশৰ বৰ্তমানৰ সভাপতি আৰু সম্পাদকৰ পদত্যাগ। পদত্যাগৰ পাছত ক্ৰিকেটাৰ সকলে নিৰ্বাচিত কৰিব পৰৱৰ্তি সভাপতি আৰু সম্পাদক।
- ছিনিয়ৰ ক্ৰিকেট দলৰ লগতে ফাৰ্ষ্ট ক্লাছ ক্ৰিকেটাৰ সকলৰ পাৰিশ্ৰমিক বৃদ্ধি।
- পূৰ্বৰ দৰে ফ্ৰেঞ্চাইজ ষ্টাইলত অনুষ্ঠিত হ’ব লাগে বি পি এল।
- বাংলাদেশৰ ঘৰুৱা টুৰ্ণামেণ্ট ঢাকা প্ৰিমিয়াৰ লীগত বেতনৰ সীমাবদ্ধতা (salary cap) থকা উচিত নহয়।
- ঘৰুৱা ক্ৰিকেট টুৰ্ণামেণ্ট বৃদ্ধিৰো দাবী তোলে।
