শক্তিশালী টীম ইণ্ডিয়াৰ দুই খ্যাতিমান বেটছমেন ৰোহিত শৰ্মা আৰু শিখৰ ধাৱানক অগা-পিছাকৈ আউট কৰি কেইঘণ্টামানৰ ভিতৰতে দেশজুৰি চৰ্চিত হৈ পৰিছে এজন ১৯ বছৰীয়া যুৱক।
ভাৰতীয় দলটোৰ নে’ট অনুশীলনৰ সময়ত এই বিৰল কৃতিত্ব অৰ্জা নৱতম চাঞ্চল্যৰ নাম হ’ল কেশৱ ডাবাছ।
ভাৰতীয়া দলটোৱে কাইলৈ বাংলাদেশৰ বিৰুদ্ধে টি-২০ এখন খেলত নামিব আৰু তাৰ বাবে দিল্লীৰ ফিৰোজ শ্বাহ কোটলা গ্ৰাউণ্ডত চলোৱা নে’ট অনুশীলনত সময়ত দিল্লীৰ এই কিশোৰজনক ব’ল কৰিবলৈ দিয়া হৈছিল।
সোঁহতীয়া বেগী ব’লাৰ ডাবাছে কেইবাটাও বিশ্ব ৰেকৰ্ডৰ অধিকাৰী ৰোহিত শৰ্মাক অফ ষ্টাম্পত ধৰা পেলোৱাৰ তিনি মিনিটৰ পিছতে টীম ইণ্ডিয়াৰ আনজন অপেনাৰ শিখৰ ধাৱানৰ ষ্টাম্প ওফৰায়।
ডাবাছে এয়ে প্ৰথম ভাৰতীয় দলৰ বেটছমেনৰ বিৰুদ্ধে বল দলিওৱাৰ সুযোগ পাইছিল। অৱশ্যে তেওঁ এই বছৰৰ প্ৰথমৰ ফালে অষ্ট্ৰেলিয়াৰ ভাৰত ভ্ৰমণৰ সময়তো অ’ফিচিয়েল নে’ট ব’লাৰ হিচাপে সুযোগ পাইছিল।
কেশৱে সুৰিন্দৰ খান্না ক্ৰিকেট একাডেমিৰ হৈ খেলে আৰু যোৱা ছিজনত তেওঁ দিল্লী অনূৰ্ধ্ব-১৯ দলটোকো এখন খেলত প্ৰতিনিধিত্ব কৰিছিল।
আজি ভাৰতীয় দলটোৰ অনুশীলনৰ সময়ত দুজনকৈ বিশ্বৰ আগশাৰীৰ বেটছমেনক বিব্ৰত কৰাৰ পিছত চাৰিওফালৰ পৰা কেশৱে প্ৰশংসা লাভ কৰিছে।
হিন্দুস্তান টাইমছৰ বাতৰিমতে, টীম ইণ্ডিয়াৰ মুখ্য প্ৰশিক্ষক ৰবি শাস্ত্ৰীও আছে তেওঁলোকৰ মাজত।
আনহাতে হঠাতে প্ৰশংসাৰ ধলে বুৰাই পেলোৱা কিশোৰজনে নিজৰ অনুভৱ খুব সন্তুষ্টিপূৰ্ণ বুলি জানিবলৈ দিয়ে সংবাদ মাধ্যমক।
“বেলেগ ধৰণৰ অনুভৱ, কি ক’ম নিজেই বুজিব পৰা নাই”, কেশৱৰ উদ্ধৃতি হিন্দুস্তান টাইমছত।
