ঢকুৱাখনাত ৩ নৱেম্বৰত বিজেপি নেতাক কৰা আক্ৰমণৰ ঘটনাটোত জড়িত তিনিজন মূল অভিযুক্তই আৰক্ষীৰ ওচৰত আত্মসমৰ্পণ কৰিছে। অভিযুক্ত আটাইকেইজন মিচিং সংগঠন টি এম পি কেৰ সদস্য।
লখিমপুৰ জিলাৰ অতিৰিক্ত আৰক্ষী অধীক্ষকৰ কাৰ্য্যালয়ত ৪ নৱেম্বৰত আত্মসমৰ্পণ কৰা অভিযুক্তকেইজন ক্ৰমে খেৰকটা আঞ্চলিক টি এম পি কে’ৰ সভাপতি লিজু দলে(৩৫), সম্পাদক ৰাজ কুমাৰ দলে (৩৪) আৰু সদস্য কিশোৰ দলে(২৮)।
ঢকুৱাখনা থানাৰ অন্তৰ্গত বকুলগুৰি অঞ্চলত ৩ নৱেম্বৰত বিজেপিৰ এখন সভাত অংশগ্ৰহণৰ বাবে যোৱা বিজেপি নেতা পৰমানন্দ চুংক্ৰাং আৰু বৈদ্যনাথ পাঞাংক বাটতে ধৰি নি ব্ৰহ্মপুত্ৰৰ পাৰত আক্ৰমণ কৰিছিল অভিযুক্তকেইজনে।
ঘটনাৰ পিছত পৰমানন্দ চুংক্ৰাঙৰ পত্নী আৰু বৈদ্যনাথ পায়েঙৰ পত্নীয়ে ১৮জনৰ নাম উল্লেখ কৰি পৃথকে পৃথকে দিয়া এজাহাৰৰ ভিত্তিত গোচৰ ৰুজু হৈছিল যদিও আক্ৰমণকাৰীসকল পলাই আছিল।
জানিব পৰামতে, টি এম পি কে’ৰ দুগৰাকী শীৰ্ষ নেতাৰ নিৰ্দেশত অভিযুক্তকেইজনে আত্মসমৰ্পণ কৰিবলৈ বাধ্য হয়।
ন-বিজেপি নেতাদ্বয়ৰ লগতে ঢকুৱাখনা মণ্ডল বিজেপিয়ে এই ঘটনাক ৰাজনৈতিক শত্ৰুতাৰ বাবে হোৱা বুলি কয়।
মন কৰিব লগীয়া যে লখিমপুৰ আৰু ধেমাজিত বিজেপিয়ে মিচিং স্বায়ত্তশাসিত পৰিষদৰ নিৰ্বাচনত মিচিং জনগোষ্ঠী ভিত্তিক ৰাজনৈতিক দল গণশক্তিৰ সৈতে একেলগে নিৰ্বাচনত অৱতীৰ্ণ হৈছিল। আনকি দুয়োটা দলে যুটীয়াভাৱে প্ৰাৰ্থী দিছিল।
উল্লেখ কৰিব পাৰি, যোৱা মাহত টি এ পি কেৰ এটা দলে ডিব্ৰুগড় জিলাৰ এটা চাপৰিত থকা আৰু গোৱালৰ বৃত্তিৰে জীৱন যাপন কৰা ভোজপুৰী সম্প্ৰদায়ৰ লোকৰ এখন গাৱঁত আক্ৰমণ কৰিছিল আৰু বহুকেইটা ঘৰ জ্বলাই দিছিল।
