অসমৰ মানুহক উৎকণ্ঠিত কৰি ৰখা বুলি চৰ্চিত “নাগা আলোচনা-কাগজকল-NRL”-এই সকলো বিষয়ৰে সিদ্ধান্ত হ’ব ৰাজ্যৰ স্বাৰ্থত, প্ৰধান মন্ত্ৰী নৰেন্দ্ৰ মোদীয়ে বৃহস্পতিবাৰে এই নিশ্চিতি দিছে।
নতুন দিল্লীত সাক্ষাৎকালত মুখ্য মন্ত্ৰী সৰ্বানন্দ সোণোৱালক মোদীয়ে এই নিশ্চিতি প্ৰদান কৰিছে।
“যিকোনো সিদ্ধান্ত লোৱাৰ পূৰ্বে অসমৰ ৰাইজৰ স্বাৰ্থ আৰু আশা কেন্দ্ৰই ৰক্ষা কৰিব,” মোদী-সোণোৱালৰ সাক্ষাতক লৈ মুখ্য মন্ত্ৰীৰ বিভাগীয় বিবৃতিত প্ৰকাশ।
বিবৃতিটোত কোৱা হৈছে, প্ৰস্তাৱিত নাগা শান্তি চুক্তিক লৈ অসমৰ জনমত সম্পৰ্কে সোণোৱালে প্ৰধান মন্ত্ৰীক অৱগত কৰিছে।
গৃহ মন্ত্ৰী অমিত শ্বাহকো বিষয়টো সন্দৰ্ভত সোণোৱালে একেদিনাই সাক্ষাৎ কৰিছে।
শ্বাহেও মুখ্য মন্ত্ৰীক প্ৰধান মন্ত্ৰীৰ অনুৰূপ নিশ্চিতিয়ে প্ৰদান কৰিছে।
তাৰোপৰি, জাগীৰোদ আৰু কাছাৰৰ কাগজ কল দুটা পুনৰ্জীৱনদান সম্পৰ্কেও মুখ্য মন্ত্ৰীয়ে মোদীৰ সৈতে বিস্তাৰিতভাৱে আলোচনা কৰা বুলি প্ৰকাশ।
“কৰ্মচাৰীসকলৰ ভৱিষ্যতৰ কথা বিবেচনা কৰি মুখ্য মন্ত্ৰী সোণোৱালে মোদীক সেইসমূহৰ পুনৰ্জীৱনদানৰ পদক্ষেপ ল’বলৈ অনুৰোধ জনাইছে,” বিবৃতিত প্ৰকাশ।
ইফালে নুমলীগড় শোধনাগাৰ লিমিটেদক বৰ্তমানৰ দৰেই ৰাজহুৱা খণ্ডৰ উদ্যোগৰূপে বাহাল ৰাখিবলৈয়ো সোণোৱালে মোদীৰ লগতে শ্বাহকো অনুৰোধ জনাইছে।
প্ৰধান মন্ত্ৰীক অহা ১০ জানুৱাৰিত গুৱাহাটীত হ’ব লগা খেল’ ইণ্ডিয়া যুৱ ক্ৰীড়া উদ্বোধনৰ বাবে সোণোৱালে নিমন্ত্ৰণ জনাইছে।
শ্ংকৰদেৱ বঁটা প্ৰদান অনুষ্ঠানলৈকো প্ৰধান মন্ত্ৰীক সোণোৱালে নিমন্ত্ৰণ জনাইছে।
