মঙলবাৰৰ পৰা আনুষ্ঠানিকভাৱে আৰম্ভ হ’ল ঐতিহ্যমণ্ডিত নলবাৰী শ্ৰী শ্ৰী হৰি মন্দিৰৰ ৮৬ সংখ্যক ৰাস মহোৎসৱ। ৰাস মহোৎসৱ আনুষ্ঠানিকভাৱে উদ্বোধন কৰে উদ্যোগ, পৰিবহন মন্ত্ৰী চন্দ্ৰমোহন পাটোৱাৰীয়ে।
১২ নৱেম্বৰৰ পৰা ২৪ নৱেম্বৰলৈ অনুষ্ঠিত হ’ব লগীয়া ৰাস মহোৎসৱ উদ্বোধন কৰি মন্ত্ৰী পাটোৱাৰীয়ে কয় যে ভক্তি মাৰ্গৰ জৰিয়তে ৰাস পালন কৰা হৈছে। তেওঁ ভক্তি মাৰ্গক শ্ৰেষ্ঠ পথ বুলিও কয়।
নলবাৰীৰ স্থানীয় বিধায়ক অশোক শৰ্মাৰ সভাপতিত্বত অনুষ্ঠিত উদ্বোধনী অনুষ্ঠানত মঙলদৈৰ সাংসদ দিলীপ শইকীয়াও ভাষণ প্ৰদান কৰে। তেওঁ ভাষণত এই ৰাস মহোৎসৱ নলবাৰীবাসীৰ স্বাভিমান বুলি উল্লেখ কৰে।
জিলাৰ উপায়ুক্ত ভাৰতভূষণ দেৱচৌধুৰীয়ে অনুষ্ঠানৰ বন্তি প্ৰজ্বলন কৰে। স্মৃতিগ্ৰন্থ উন্মোচন কৰে অসম সাহিত্য সভাৰ সভাপতি ড° পৰমানন্দ ৰাজবংশীয়ে।
উদ্বোধনী অনুষ্ঠানত ৰবীন্দ্ৰনাথ ঠাকুৰ বিশ্ববিদ্যালয়ৰ উপাচাৰ্য ড° অমলেন্দু চক্ৰৱৰ্তী, পৰ্যটন উন্নয়ন নিগমৰ অধ্যক্ষ জয়ন্তমল্ল বৰুৱা, বিধায়ক নাৰায়ণ ডেকা আৰু ৰঙিয়া এন এফ ৰে’লৱেৰ মাণ্ডলিক প্ৰৱন্ধক ভি এ মলেগৱংকাৰ উপস্থিত থাকে।
১৩ দিনীয়াকৈ অনুষ্ঠিত হ’ব লগীয়া ৰাস মহোৎসৱৰ উদ্বোধনী অনুষ্ঠানৰ পূৰ্বে গৰ্ডন খেলপথাৰৰ পৰা এটা বিশাল সাংস্কৃতিক ৰেলী উলিওৱা হয়।
উত্তৰ-পূব ভাৰতৰ ধাৰ্মিক আৰু সাংস্কৃতিক অনুষ্ঠানসমূহৰ অন্যতম নলবাৰী শ্ৰী শ্ৰী হৰিমন্দিৰত ১৯৩৩ চনৰে পৰা নিৰৱচ্ছিন্নভাবে উদযাপিত হৈ আহিছে ৰাস মহোৎসৱ।
উল্লেখ্য যে অসম পৰ্যটন নিগমৰ পূৰ্ণ সহযোগিতাত হ’ব লগীয়া এইবাৰৰ ৰাস মহোৎসৱত পৰ্যটকৰ বাবে বিভিন্ন পদক্ষেপ গ্ৰহণ কৰিছে ৰাস মহোৎসৱ সমিতিয়ে। দূৰ দূৰণিৰ দৰ্শনাৰ্থীৰ বাবে অসম ৰাজ্যিক পৰিবহণ নিগমে বাছৰ বিশেষ সেৱা আগবঢ়াব।
