অসমৰ প্ৰাক্তন শিক্ষা মন্ত্ৰী ৰূপনছিং ৰংহাং আৰু নাই

অসমৰ প্ৰাক্তন মন্ত্ৰী, কংগ্ৰেছ নেতা ৰূপনছিং ৰংহাঙৰ দেওবাৰে ৰাতি গৃহ চহৰ ডিফুত মৃত্যু হৈছে। তেওঁৰ বয়স আছিল ৭১ বছৰ।

বয়সজনিত ৰোগত চিকিৎসাধীন হৈ থকা ৰংহাঙে ডিফু অসামৰিক চিকিৎসালয়ত ৰাতি প্ৰায় ১১.৩০ বজাত শেষ নিশ্বাস ত্যাগ কৰিছে। মঙলবাৰে স্বগৃহত তেওঁৰ শেষকৃত্য সম্পন্ন কৰা হ’ব।

১৯৯৯ চনত কংগ্ৰেছত যোগ দি সক্ৰিয় ৰাজনীতিলৈ অহা ৰংহাং ২০০১ চনত তৰুণ গগৈ চৰকাৰৰ শিক্ষা (ৰাজ্যিক) মন্ত্ৰী আছিল।

ৰংহাং বৈঠালাংছু সমষ্টিৰ বিধায়কৰূপে নিৰ্বাচিত হৈ আহিছিল।

সক্ৰিয় ৰাজনীতিত যোগ দিয়াৰ আগৰে পৰা ৰংহাং বিভিন্ন কাৰ্বি জাতীয় সংগঠনৰ লগত জৰিত আছিল।

তেওঁ সুকীয়া ৰাজ্য দাবী আন্দোলনতো নেতৃত্ব দিছিল। কাৰ্বি আংলং আৰু উত্তৰ কাছাৰ পাৰ্বত্য জিলা স্বায়ত্তশাসিত ৰাজ্য দাবী সমিতি (KANCHASDCOM)ৰ তেওঁ সভাপতি আছিল।

ৰংহাঙৰ মৃত্যুক অসম প্ৰদেশ কংগ্ৰেছ সমিতিয়ে “অপূৰণীয় ক্ষতি”ৰূপে অভিহিত কৰিছে আৰু শোক সন্তপ্ত পৰিয়াললৈ সমবেদনা জ্ঞাপন কৰিছে।

কাৰ্বি আংলং জিলা আৰু বোকাজান ব্লক কংগ্ৰেছ সমিতিয়েও তেওঁৰ মৃত্যুত গভীৰ শোক প্ৰকাশ কৰিছে।

খৰছিং ইংতি, চাৰছিং ইংতি প্ৰমুখ্যে জিলা কংগ্ৰেছৰ নেতৃত্বই ৰংহাঙৰ শোক সন্তপ্ত পৰিয়াললৈ সমবেদনা জ্ঞাপন কৰিছে।

কাৰ্বি আংলং স্বায়ত্তশাসিত পৰিষদৰ মুখ্য কাৰ্য্যবাহী সদস্য তুলিৰাম ৰংহাঙে নিজৰ শোকবাণীত ৰংহাঙক “তেওঁৰ যুগৰ এজন প্ৰভাৱশালী নেতা” আছিল বুলি মন্তব্য কৰিছে।

My condolences to the bereaved family of Lt. Ruponsing Ronghang, ex- Minister, who passed away today. He had been an influential leader of his time. pic.twitter.com/qi80UgZTS6

— Tuliram Ronghang (@TuliramRonghang) November 18, 2019

ৰাজনীতিলৈ অহাৰ পূৰ্বে ৰংহাং কফি ব’ৰ্দত কৰ্মৰত আছিল আৰু লিয়েইজন অফিচাৰৰ দায়িত্বত থকা অৱস্থাত চাকৰি ইস্তফা দিছিল।

তেওঁ গুৱাহাটী বিশ্ববিদ্যালয়ৰ পৰা এম এছ চি আৰু পিছত এল এল বি ডিগ্ৰী লৈছিল।

১৯৪৮ চনত জন্ম লোৱা ৰংহাং খয়ছিং ৰংহাং আৰু কাফুই তেৰনপিৰ জ্যেষ্ঠ সন্তান আছিল।