এজন কুখ্যাত অপৰাধীক গ্ৰেপ্তাৰ কৰাৰ বাবে হাবাথুৰি খাইছিল আৰক্ষী। কোনোমতেই ধৰিব পৰা নাছিল অপৰাধীজনক। অৱশেষত এক ব্যতিক্ৰমী পথ অৱলম্বন কৰিলে আৰক্ষীয়ে।
অপৰাধীজনৰ ফোন নম্বৰ সংগ্ৰহ কৰি এগৰাকী মহিলা আৰক্ষী বিষয়াৰ জৰিয়তে দিয়া হ’ল বিয়াৰ প্ৰস্তাৱ। এইদৰেই সফলতা আহিল। আৰক্ষীয়ে গ্ৰেপ্তাৰ কৰিলে অপৰাধীক।
চিনেমাৰ কাহিনীৰ দৰে এই ঘটনাটো সংঘটিত হৈছে মধ্যপ্ৰদেশৰ ছট্টৰপুৰত।
বাতৰি অনুসৰি উত্তৰ প্ৰদেশৰ মহবা জিলাৰ বিজৌৰি গাঁওৰ বালকিষণ চৌবে নামৰ অপৰাধীজনৰ নামত হত্যাকে ধৰি মুঠ ১৬টা গোচৰ আছে।
চলিত বৰ্ষৰ আগষ্ট মাহত মধ্যপ্ৰদেশৰ নাওগাও অঞ্চলত তাৰ বিৰুদ্ধে এজন লোকক হত্যা কৰাৰ অভিযোগ উঠে। ইয়াৰ পাছতেই বালকিষণৰ সন্ধানত আৰক্ষীয়ে তালাচী অব্যাহত ৰাখে।
বহু প্ৰচেষ্টাৰ পাছতো আৰক্ষী সন্ধান লাভত ব্যৰ্থ হোৱাৰ পাছত বালকিষণক সন্ধান দিওঁতাক ১০ হাজাৰ টকাৰ পুৰষ্কাৰো ঘোষণা কৰে। কিন্তু ইয়াতো সফল নহ’ল আৰক্ষী।
ইয়াৰ মাজতে হঠাতে বালকিষণৰ মোবাইল নম্বৰ এটা আৰক্ষীৰ হাতত পৰে। সেইটো ট্ৰেক কৰি তাৰ গোপন ঘাটিৰ সন্ধান লাভ কৰে যদিও আৰক্ষীয়ে সেই স্থান গৈ পোৱাৰ পূৰ্বে সি পলায়ন কৰে।
প্ৰায় হতাশ হৈ পৰা আৰক্ষীৰ তদন্তকাৰী দলে অৱশেষত এটা অভিনৱ পন্থা গ্ৰহণ কৰে। আৰক্ষীয়ে জানিব পাৰে যে পলাতক অপৰাধী বালকিষণে বিয়াৰ কৰাবৰ বাবে ছোৱালী বিচাৰিছে।
এই খবৰ লাভ কৰাৰ পাছতে এগৰাকী মহিলা বিষয়াক টোপ হিচাপে ব্যৱহাৰ কৰে আৰক্ষীয়ে।
পৰিকল্পনা মতে দিল্লীৰ পৰা সংগ্ৰহ কৰা এখন ছীমকাৰ্ডৰ পৰা এদিন হঠাতে মহিলাগৰাকীয়ে ফোন কৰে। ফোন কৰি মহিলাগৰাকীয়ে কয় যে ভুলতে ফোনটো লাগি গ’ল। কিন্তু ইয়াৰ পাছতো ফোনটো কাটি নিদিলে বালকিষণে।
বালকিষাণে মহিলাগৰাকীৰ ঘৰ ক’ত জানিব বিচাৰে। চিকাৰ হাতত পৰাৰ ইংগিত লাভ কৰি তেওঁ নিজকে বুণ্ডেলখণ্ডৰ বাসিন্দা বুলি জনাই লগতে ক’লে যে কামৰ খাতিৰত বৰ্তমান দিল্লীতে থাকিবলৈ লৈছে। সিদিনা দুয়োজনে কিছু কথা পাতিলে।
ইয়াৰ পিছদিনাৰ পৰাই বালকিষণে ফোন কৰিবলৈ আৰম্ভ কৰিলে। লাহে লাহে দুয়োৰে মাজত ঘনিষ্ঠতা গঢ়ি উঠিল। সম্পৰ্ক গভীৰ হৈ পৰাৰ উপলব্ধি কৰি এদিন হঠাতে মহিলা আৰক্ষী বিষয়াগৰাকীয়ে বিয়াৰ প্ৰস্তাৱ দিলে।
লগে লগে ৰাজী হৈ গ’ল বালকিষাণ। দুয়োজনে আলোচনা কৰি মধ্যপ্ৰদেশৰ ছট্টৰপুৰৰ এটি মন্দিৰত বিয়া পতাৰ সিদ্ধান্ত ল’লে।
যোৱা বৃহস্পতিবাৰে পৰিকল্পনা অনুসৰি সেই মন্দিৰত দৰাৰ বেশত উপস্থিত হ’ল বালকিষণ। ইয়াতেই সাধাৰণ পোছাকত থকা আৰক্ষীয়ে বালকিষণক গ্ৰেপ্তাৰ কৰি আনি ভৰালে ৰঙাঘৰত।
