নগাঁও জিলাৰ পুৰণিগুদামত বিভিন্ন সময়ত হাতী-মানুহৰ সংঘাত চলি থকাৰ সময়তে নগাঁও সদৰ আঞ্চলিক বন বিষয়া কাৰ্যালয়ৰ অন্তৰ্গত পুৰণিগুদাম কাষৰিগাঁৱত সংঘটিত হৈছে আন এক দুৰ্ভাগ্যজনক ঘটনা।
পুৰণিগুদাম কাষৰিগাঁৱৰ ৩৭ নং ৰাষ্ট্ৰীয় ঘাইপথত মঙলবাৰে নিশা এখন দ্ৰুতবেগী বাহনৰ খুন্দাত মৃত্যু হ’ল এজনী মাইকী লতামেকুৰী বাঘৰ।
পাছত ৰাস্তাত পৰি থকা অৱস্থাত স্থানীয় ৰাইজে মৃত বাঘজনীক দেখা পাই তাৰ পৰা তুলি আনি নগাঁও সদৰ আঞ্চলিক বন বিষয়া কাৰ্যালয়ৰ বন কৰ্মীৰ হাতত গতাই দিয়ে।
আনহাতে ঘাইপথত লতামেকুৰী বাঘ ঘুৰি-ফুৰাৰ খবৰ বিয়পী পৰাৰ পিছতে অঞ্চলটোত এক আতংকময় পৰিস্থিতিৰ সৃষ্টি হয়। উক্ত বাঘজনীৰ বাহিৰেও অঞ্চলটোত আন বাঘ থাকিব পাৰে বুলি স্থানীয় ৰাইজে সন্দেহ কৰিছে।
ইয়াৰ উপৰি মৃত বাঘজনীক পোৱালি থকাৰ সন্দেহ কৰি বন বিভাগৰ দুজন বনৰক্ষীয়ে পুৱাৰ ভাগত অঞ্চলটোত বিচাৰ-খোচাৰ চলাই যদিও বাঘৰ পোৱালি বিচাৰি নাপালে।
