সমগ্ৰ দেশত নাগৰিকত্ব (সংশোধনী) আইনৰ বিৰুদ্ধে চলি থকা মহা প্ৰতিবাদ সন্দৰ্ভত মত ব্যক্ত কৰিছে জনপ্ৰিয় অভিনেত্ৰী প্ৰিয়ংকা চোপ্ৰাই।
প্ৰিয়ংকা চোপ্ৰাই জামিয়া মিলিয়া আৰু আলিগড় বিশ্ববিদ্যালয়ৰ ছাত্ৰ-ছাত্ৰীসকলক আৰক্ষীয়ে আক্ৰমণ কৰা ঘটনাক নিন্দা কৰে।
প্ৰিয়ংকাই শান্তিপূৰ্ণ প্ৰতিবাদকাৰীৰৰ ওপৰত অত্যাচাৰ কৰা কাৰ্য্যকো সমালোচনা কৰি ছাত্ৰ-ছাত্ৰীসকলক মত প্ৰকাশৰ সুবিধা দিয়া উচিত বুলি কয়।
টুইটাৰত প্ৰিয়ংকা চোপ্ৰাই দেশৰ ভাল পৰিৱৰ্তনৰ বাবে সকলো কণ্ঠ একগোট হৈ আগবাঢ়ি যোৱাৰ বাবে আহ্বান জনায়।
প্ৰিয়ংকা চোপ্ৰাৰ পূৰ্বে অভিনেতা ফাৰহান আখতাৰ, শ্বাৰা ভাস্কৰ, কণ্ঠশিল্পী বিশাল ভৰদ্বাজ, ক্ৰিকেটাৰ ইৰফান পাঠানেও বিশ্ববিদ্যালয়ৰ ছাত্ৰক আৰক্ষীয়ে কৰা আক্ৰমণৰ ঘটনাক সমালোচনা কৰি ইয়াক অগণতান্ত্ৰিক আখ্যা দিছিল।
উল্লেখযোগ্য যে, অসম তথা উত্তৰ-পূবত আৰম্ভ হোৱা নাগৰিকত্ব (সংশোধনী) আইন বিৰোধী প্ৰতিবাদ দেশৰ সমগ্ৰ প্ৰান্তত বিয়পি পৰে।
অসমত প্ৰতিবাদৰ বাবে ৯ দিন ধৰি বন্ধ কৰি থোৱা মোবাইল ইণ্টাৰনেট সেৱা আজি গুৱাহাটী উচ্চ ন্যায়ালয়ৰ নিৰ্দেশত চৰকাৰে মুকলি কৰি দিবলৈ বাধ্য হয়।
