নাগৰিকত্ব (সংশোধন) আইন বাতিলৰ দাবীত আজি শিৱসাগৰত অসমীয়াৰ ৰণধ্বনি। শিৱসাগৰবাসী ৰাইজৰ আহ্বানত আজি শিৱসাগৰৰ ঐতিহ্যমণ্ডিত ব’ৰ্ডিং খেল পথাৰত হাজৰ হাজাৰ ৰাইজ ওলাই আহে ‘কা’ বিৰোধী প্ৰতিবাদ কৰিবলৈ।
বৰষাৰাণী বিষয়া, মানস ৰবীনকে ধৰি শিল্পীসমাজে অংশ গ্ৰহণ কৰাৰ উপৰিও বিশিষ্ট সাংবাদিক অজিত কুমাৰ ভূঞায়ো অংশ গ্ৰহণ কৰে। জনসমুদ্ৰত পৰিণত হ’ল শিৱসাগৰৰ ব’ৰ্ডিং খেলপথাৰ।
গীত, কবিতা, জিকিৰ, দিহানাম, ভাষণ আদিৰ মাধ্যমেৰে প্ৰতিবাদকাৰীসকলে তীব্ৰ প্ৰতিবাদী কাৰ্যসূচী ৰূপায়ণ কৰে। এই প্ৰতিবাদী সভাৰ পৰাই সমগ্ৰ শিৱসাগৰবাসীয়ে অখিল গগৈ, জিতেন দত্ত আৰু আন আন নেতা সকলক বিনাচৰ্তে মুকলি কৰি দিবলৈ চৰকাৰক আহ্বান জনায়।
বিশিষ্ট সাংবাদিক অজিত কুমাৰ ভূঞাই কয় যে চৰকাৰে অখিল গগৈ লৈ ইমান ভয় কৰে যে সকলো কলা আইন তেওঁৰ ওপৰত জাপি দি শেষত এখন জঘন্য আইন তেওঁৰ ওপৰত জাপি দি তেওঁক গ্ৰেপ্তাৰ কৰিলে।
গতিকে ইয়াৰ বিৰুদ্ধে অসমীয়া ৰাইজক গৰজি উঠিবলৈ আহ্বান জনাই ভূঞাই এই মঞ্চৰ পৰাই অখিল গগৈক মুক্তি দিয়াৰ দাবী উত্থাপন কৰে।
“মুখ্যমন্ত্ৰী সৰ্বানন্দ সোনোৱালে আকৌ এবাৰ ৰাইজৰ কথা কৈছে। ৰাইজে তেওঁক বিশ্বাস কৰে আৰু সেই বিশ্বাসত তেওঁক মুখ্যমন্ত্ৰী পাতিলে। হয় ৰাইজে তেওঁক বিশ্বাস কৰিছিল। কিন্তু বিশ্বাস ভংগ আৰু বিশ্বাসঘাতকতা এনেধৰণৰ হ’ব বুলি ভবা নাছিলে। যাৰ বাবে তোমাক বদন আখ্যা দিছে।” মন্তব্য বিশিষ্ট সাংবাদিক অজিত কুমাৰ ভূঞাৰ।
তাৰোপৰি বাংলাদেশৰ হিন্দু সভাৰ মুৰব্বী গৰাকীয়ে এই আইন গৃহীত হ’লে বাংলাদেশৰ পৰা ডেৰ-দুই কোটি বাংলাদেশী হিন্দু ভাৰতলৈ আহিবলৈ ঠেং দাঙি আছে বুলিও ভূঞাই আজি প্ৰতিবাদস্থলীতে উল্লেখ কৰে।
লগতে অসমৰ শিল্পীসকলে চৰকাৰৰ ৫০ হাজাৰ টকাৰ প্ৰলোভন নেওচি আন্দোলনত যোগ দিয়াৰ বাবে শিল্পী সমাজক ধন্যবাদ জনায় বিশিষ্ট সংবাদিকজনে শিল্পীসকলক পঞ্চাশ হাজাৰ টকাত বিক্ৰী নাযাবলৈও আহ্বান জনায়।
আনহাতে বিশিষ্ট সাহিত্যিক নাহেন্দ্ৰ পাদুনে শিৱসাগৰৰ পৰাই মুখ্য মন্ত্ৰী সৰ্বানন্দ সোণোৱালক জাতীয় খলনায়ক বুলি অভিহিত কৰে।
ইফালে অভিনেত্ৰী বৰষাৰাণী বিষয়াই কয়, “অসমীয়া ৰাইজৰ লগত প্ৰতিদ্বন্দিতা কৰি চৰকাৰে কালি শান্তি সমদল উলিয়ালে। যদি শান্তিয়েই বিচাৰে তেন্তে ৰাইজৰ দাবী মানই লওক, ‘কা’খন বাতিল কৰক, আপোনালোকও শান্তিত থাকক আমিও শান্তিত থাকো।”
