আজি পুৱা ৬. ৩০ বজাত বীৰ লাচিত সেনাৰ নেতা শৃংখল চলিহাৰ শিৱসাগৰৰ ফুকন নগৰস্থিত বাসগৃহত চি আই ডিৰ দুজনীয়া দল এটাই তালাচী চলায়। হিতেশ শৰ্মাৰ নেতৃত্বত অহা চি আই ডি দলটোক সহযোগ কৰে শিৱসাগৰ আৰক্ষী আৰু চি আৰ পি এফ বাহিনীয়ে।
তালাচীৰ সময়ত শৃংখল চলিহাৰ ৰুগীয়া পিতৃ আৰু মাতৃৰ লগতে ঘৰৰ আন আন সদস্যক জেৰা চলোৱা বুলি জানিব পৰা গৈছে। আনহাতে শৃংখলৰ ৰূমৰ পৰা একো আপত্তিজনক বস্তু উদ্ধাৰ নাই কৰা যদিও চি আই ডিয়ে শৃংখলৰ মাতৃৰ মোবাইল ফোনটো লৈ যায়।
তেওঁৰ পিতৃ তথা অসম আন্দোলনৰ নেতা ৰমু ওৰফে প্ৰণৱজিত চলিহাই কয়, ‘শৃংখলৰ লগতে এতিয়া ময়ো আন্দোলনত নামিছো। আমাৰ এক প্ৰতিবাদী কন্ঠ আছে। সেই কন্ঠ ৰোধ কৰি তেওঁলোকৰ ওচৰত আঠু ল’বৰ বাবে এইদৰে আমাক ভাবুকি প্ৰদান কৰিছে। শ শ পুলিচ চি আৰ পিয়ে আমাৰ ঘৰ ঘেৰাও কৰি এক সন্ত্ৰাসৰ পৰিৱেশ সৃষ্টি কৰিছে।’
‘মই কোনোদিন মোৰ প্ৰতিবাদী কণ্ঠ ৰুদ্ধ হ’বলৈ নিদিও’ বুলি উল্লেখ কৰি তেওঁ লগতে কয় যে কা’ বিৰোধী আন্দোলনৰ পৰা বিৰত কৰি ৰখাৰ বাবে চৰকাৰৰ এইয়া এক ‘নিকৃষ্ট প্ৰয়াস’, এক ‘চৰকাৰী সন্ত্ৰাসবাদ’।
অসমৰ সমূহ জনগণৰ প্ৰতি আহ্বান জনাই তেওঁ কয়, ‘শাৰিৰিকভাৱে মই যথেষ্ট অসুস্থ, এই বিপদৰ সময়ত যাতে মোৰ কাষত থাকি সহায় যোগায় তাকেই কামনা কৰিছো’।
উল্লেখযোগ্য যে কা’ বিৰোধী আন্দোলনত সক্ৰিয় ভুমিকা লৈ অহা শৃংখল চলিহাক যোৱা ২৩ ডিচেম্বৰত ডিব্ৰুগড়ৰ পৰা আৰক্ষীয়ে আটক কৰিছিল।
