হী জিয়ানকুই- প্ৰায় এবছৰ আগতে জন্মৰ পূৰ্বে কেঁচুৱাৰ জিনীয় সালসলনি কৰা বুলি ঘোষণাৰে বিশ্বক সচকিত কৰা এই নামৰ চীনৰ গৱেষক বিজ্ঞানীজনক তিনি বছৰৰ কাৰাদণ্ড দিয়া হৈছে।
বিশ্বত প্ৰথম উদাহৰণ চিকিৎসাবিজ্ঞানীজনৰ এই “অনৈতিক” কামে বিশ্বৰ বিজ্ঞানী সমাজত আলোড়ন তুলিছিল আৰু তাৰ পিছতে এই ঘটনাটোৰ তদন্ত আৰম্ভ হৈছিল। কাৰাদণ্ডৰ লগতে তেওঁক ৪,৩০,০০০ ডলাৰৰ জৰিমনাও বিহা হয়।
দক্ষিণ-পূব চীনৰ এখন আদালতে গৱেষকজনক দোষী সাব্যস্ত কৰে আৰু ৩০ ডিচেম্বৰত শাস্তি ঘোষণা কৰে। দেশখনৰ চৰকাৰী বাতৰি প্ৰতিষ্ঠান জিনহুৱাই কয়, তদন্তত পোহৰলৈ আহে যে সন্তান আশা কৰা দম্পতীটোক নিযুক্তিৰ বাবে চিকিৎসক গৱেষকজনে এথিক্স ৰিভিউ ব’ৰ্ডৰ পৰা ভুৱা অনুমোদন নথি ব্যৱহাৰ কৰিছিল।
উল্লেখযোগ্য যে দম্পতীটোৰ পুৰুষজন এইচ্ছ আই ভি সংক্ৰমিত আছিল।
৩৫ বছৰীয়া ডা: হীয়ে কৈছিল যে তেওঁ কেঁচুৱাকেইটা (যমজ)ৰ গালৈ এইচ্ছ আই ভি সংক্ৰমণ ৰোধ কৰিবলৈ চেষ্টা কৰিছিল। কিন্তু চৰকাৰী বাতৰি প্ৰতিষ্ঠানটোৱে কৈছে, তেওঁ দম্পতীটো আৰু চিকিৎসা কৰ্তৃপক্ষ উভয়কে একেদৰে প্ৰতাৰণা কৰিছিল।
যোৱা বছৰ হংকঙত এখন সভাত ডা: হীয়ে বিশ্বত প্ৰথম তেৱেঁ জিনীয় সম্পাদন ঘটোৱা শিশু (দুটি যমজ কন্যা শিশু) সৃষ্টি কৰা বুলি ঘোষণা কৰিছিল।
৩০ ডিচেম্বৰত এই বাতৰিটো প্ৰকাশ কৰা চৰকাৰী সংবাদ প্ৰতিষ্ঠানটোৱে আগৰ ঘটনাৰ বিষয়ে প্ৰকাশ নকৰাকৈ কয় যে তেওঁৰ কামে তৃতীয়টো জিনীয় সালসলনি ঘটোৱা শিশুৰ সৃষ্টি কৰিছিল। ঘটনা
“অভিযুক্তই খ্যাতি আৰু লাভৰ অভিপ্ৰায় লৈ বৈজ্ঞানিক আৰু চিকিৎসা গৱেষণাৰ সংশ্লিষ্ট ৰাষ্ট্ৰীয় আইন ইচ্ছাপূৰ্বক উলংঘা কৰিছে আৰু বৈজ্ঞানিক আৰু চিকিৎসা নীতিৰ অন্তিম সীমা অতিক্ৰম কৰিছে”, জিনহুৱাত আদালতৰ ভাষ্যৰ উদ্ধৃতি।
আদালতে ডা: হীৰ লগতে তেওঁক সহযোগিতা কৰা আন দুজনৰ এজনক ২বছৰ আৰু আনজনক ডেৰ বছৰ কাৰাদণ্ড দিয়ে।
ডা: হীৰ ঘোষণাই তেওঁক বৈজ্ঞানিক সমাজৰ দ্বাৰা বৰ্জিত কৰাইছিল আৰু চীনৰ বৈজ্ঞানিক উচ্চাকাংক্ষাৰ উৎকট ৰূপটো দৃশ্যমান কৰিছিল।
আনকি আমেৰিকাৰ হীৰ সৈতে সম্পৰ্ক থকা চিকিৎসা বিজ্ঞানীসকলকো এই ঘটনাই সাঙুৰি পেলাইছিল। আমেৰিকাত ডা: হীৰ আঁচনিবোৰৰ বিষয়ে অৱগত একাধিক বিজ্ঞানী তদন্তৰ সন্মুখীন হয়।
যদিও হীয়ে তেওঁৰ দাবীৰ সপক্ষে কোনো প্ৰমাণ দাঙি ধৰিব পৰা নাছিল বা তেওঁ কি কৰিলে তাৰ স্পষ্ট প্ৰমাণ কৰিব পৰা কোনো সাক্ষ্য বা তথ্য বিনিময় কৰা নাছিল, তেওঁৰ সতীৰ্থসকলৰ মত হ’ল, তেওঁ সফল হোৱাটো সম্ভৱ।
এটা সূত্ৰৰ মতে, জিনীয় সম্পাদনেৰে তৃতীয়টো শিশু জন্ম দিওৱাৰ বাবে কাম কৰি আছিল ডা: হীয়ে।
