টেষ্ট ক্ৰিকেটত প্ৰথমটো ফাৰ্ষ্ট-অ’ভাৰ হেট্ৰিক অৰ্জা ইৰফান পাঠানক আৰু খেলুৱৈৰূপে দেখা নাপাব।
অলৰাউণ্ডাৰৰূপেও খ্যাতি অৰ্জা বাওঁহতীয়া পে’চাৰজনে সকলো ধৰণৰ ক্ৰিকেটৰ পৰাই শনিবাৰে অৱসৰ ঘোষণা কৰিছে।
বৰ্তমান ক্ৰিকেট ধাৰভাষ্যকাৰক হিচাপে কাম কৰি অহা খেলুৱৈজনে Star Sports studioত তেওঁৰ অৱসৰৰ কথা ঘোষণা কৰিছে।
পাঠানে ভাৰতৰ হৈ ২৯খন টেষ্ট, ১২০খন এদিনীয়া আৰু ২৪খন টি২০ খেলত অংশ লৈছিল।
১৯ বছৰ বয়সত ২০০৩ চনত এদিলেইদত অষ্ট্ৰেলিয়াৰ বিৰুদ্ধে অভিষেক ঘটোৱা পাঠানৰ প্ৰথম চিকাৰ আছিল মেথিউ হে’দেন।
ক্ৰিকেটাৰগৰাকীৰ জীৱনৰ দুটা স্মৰণীয় কীৰ্তি আছিল পাকিস্তানৰ বিৰুদ্ধে খেলত।
২০০৬ চনত পাকিস্তানৰ বিৰুদ্ধে এখন খেলত তেওঁ ক্ৰিকেট ইতিহাসৰ প্ৰথমটো প্ৰথম-অ’ভাৰ হেট্ৰিক লাভ কৰিছিল।
২০০৭ চনৰ পাকিস্তানৰ বিৰুদ্ধে বিশ্ব টি২০ ফাইনেলত পাঠান মেন অৱ দি মেচ হৈছিল।
পাঠানৰ এক স্মৰণীয় অলৰাউণ্ড প্ৰদৰ্শন আছিল পাৰ্থত অষ্ট্ৰেলিয়াৰ বিৰুদ্ধে। ভাৰতে কেংগাৰুভূমিত ঐতিহাসিক বিজয় সাব্যস্ত কৰা ২০০৭-০৮ টুৰত তেওঁ মেন অৱ দি মেচো ঘোষিত হৈছিল।
২০০৪ চনৰ পাকিস্তান টুৰৰ পৰা পাঠানৰ স্থান ভাৰতীয় দলত নিগাজী হৈছিল। আৰু ২০০৮ চনলৈকে তেওঁ দলৰ প্ৰায় নিয়মীয়া খেলুৱৈ আছিল।
পাঠানে ভাৰতৰ হৈ মুঠ ৩০১টা আন্তঃৰাষ্ট্ৰীয় উইকেট অৰ্জন কৰিছিল।
বেটছমেনৰূপে তেওঁ ৩১.৫৭ গড়েৰে ২৯খন টেষ্টৰ ৪০টা ইনিংছ খেলিছিল। তাৰ মাজত আছিল এটা শতক আৰু ছটা অৰ্ধশতক।
এদিনীয়া আৰু টি২০ত পাঠানৰ বেটিং গড় আছিল ক্ৰমে ২৩.৩৯ আৰু ২৪.৫৭ (।)
২০০৮ চনলৈ পাঠানৰ প্ৰদৰ্শন নিম্নগামী হৈছিল। সেই বছৰ দক্ষিণ এফ্ৰিকাৰ বিৰুদ্ধে খেলা টেষ্টখনেই তেওঁৰ অন্তিমখন দীঘলীয়া অ’ভাৰৰ খেল।
২০১২ চনলৈকে তেওঁ এদিনীয়া আৰু টি২০ত ভাগ লৈ আহিছিল, কিন্তু নিম্নমানৰ প্ৰদৰ্শনৰ ফলত পাঠানে ঘৰুৱা ক্ৰিকেটত মনোনিৱেশ কৰিবলৈ বাধ্য হৈ পৰিছিল।
৩৫ বছৰীয়া খেলুৱৈজনৰ অন্তিম আই পি এল খেল আছিল ২০১৭ চনত। পিছৰ তিনিবাৰ নিলামত তেওঁক কোনেও বাচনি কৰা নাছিল।
