আজি বলীউদৰ মোহময়ী অভিনেত্ৰী দীপিকা পাডুকনৰ জন্মদিন। দীপিকাই আজিৰ এই বিশেষ দিনটো কিছু বিশেষ লোকৰ সৈতে উদযাপন কৰিব বিচাৰিছে।
দীপিকা পাডুকনে তেওঁৰ জন্মদিনটো এচিড আক্ৰমণৰ বলি লোকৰ সৈতে পালন কৰিব। শিৰোজ কেফেৰ মিডিয়া সম্পৰ্কৰক্ষী সীমা যাদবে কয় যে দীপিকাৰ আগমনৰ খবৰত কেফেৰ এচিড আক্ৰান্ত ব্যক্তিসকল আনন্দিত হৈ পৰিছে।
দীপিকাৰ জন্মদিনটো বিশেষভাৱে উদযাপনৰ বাবে তেওঁলোকে ব্যাপক প্ৰস্তুতি চলাইছে।
সীমা যাদবে জানিবলৈ দিয়ে যে দীপিকাৰ নতুন ছবিখনত এচিড আক্ৰমণৰ বলি লোকৰ জীৱনৰ সৈতে জড়িত বেদনাৰ লগতে তেওঁলোকৰ সংগ্ৰামৰ কাহিনী দৰ্শকে ওচৰৰ পৰা চাব পাৰিব।
জানিব পৰা মতে, কেফেখনত ছবিখনৰ পোষ্টাৰ-বেনাৰ আদি লগোৱা হৈছে। দীপিকা প্ৰায় আধা ঘন্টা ইয়াত থাকিব। ইয়াতেই তেওঁৰ জন্মদিনৰ কেক কটাৰ লগতে এক অনুষ্ঠানৰ আয়োজন কৰা হৈছে।
ইয়াতেই এচিড আক্ৰান্তৰ কাহিনী, সংগ্ৰাম, উত্তৰণ আৰু ছাও ফাউণ্ডেশ্যনৰ ওপৰত এখন চুটি তথ্যচিত্ৰ প্ৰদৰ্শিত হ’ব।
উল্লেখযোগ্য যে এইকেইদিন দীপিকা পাডুকন তেওঁৰ নতুনকৈ মুক্তি পাবলগীয়া ছবি ‘ছপাক’ৰ প্ৰম’চনত ব্যস্ত আছে।
‘ছপাক’ত দীপিকাই এচিড আক্ৰমণৰ বলি লক্ষ্মী আগৰৱালাৰ চৰিত্ৰ ৰূপায়ন কৰিছে। অহা ১০ জানুৱাৰিত মুক্তি পাবলগীয়া ছবিখনৰ পৰিচালক হৈছে মেঘনা গুলজাৰ।
