মুখ্য মন্ত্ৰী সৰ্বানন্দ সোণোৱালে শিক্ষা অভিযান, অসমৰ সৈতে সোমবাৰে এখন পৰ্যালোচনা বৈঠকত মিলিত হয়। বৈঠকত ২০১৮-১৯ বৰ্ষৰ চৰকাৰী আৰু অপ্ৰাদেশীকৃত বিদ্যালয়ৰ প্ৰথম শ্ৰেণীৰ পৰা দ্বাদশ শ্ৰেণীলৈ মুঠ ৪৬৬৯৯৭০ নামভৰ্তি হোৱা বুলি কয়। যিটো ২০১৬-১৭ বৰ্ষৰ তুলনাত কম।
ৰাজ্যৰ চৰকাৰী বিদ্যালয়ত ৩.১২ লাখতকৈও অধিক ভুৱা শিশুৰ নাম পূৰ্বৰ কংগ্ৰেছ চৰকাৰৰ কাৰ্যকালত পঞ্জীয়ন কৰাটো চিনাক্তকৰণ কৰা হোৱা বুলিও বৈঠকত মুখ্য মন্ত্ৰীক অৱগত কৰোৱা হয়।
পূৰ্বৰ চৰকাৰৰৰ কাৰ্যকালত চৰকাৰী বিদ্যালয় সমূহত এই ভুৱা ছাত্ৰ-ছাত্ৰীসকলৰ নামত পাঠ্যপুথি, মধ্যাহ্ন ভোজন, য়ুনিফৰ্ম ইত্যাদিৰ বাবে বৃহৎ ৰাজহুৱা পুঁজি ব্যয় হৈছে আৰু ইয়াৰ লগত জড়িত লোকৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলিও কয়।
বৈঠকত এইটো উল্লেখ কৰা হয় যে সৰ্বমুঠ ৮৬০৯৪ গৰাকী স্কুলত নামভৰ্তি নকৰা ছাত্ৰ-ছাত্ৰী শিক্ষা বিভাগৰ দ্বাৰা চিনাক্ত কৰা হৈছে আৰু ১০ বৰ্ষৰ ডিচেম্বৰলৈকে ইয়াৰে ৬৩৪০৬ গৰাকী শিশুক আনুষ্ঠানিক শিক্ষাৰ অধীনলৈ অনা হৈছে। বৰ্তমানৰ ৰাজ্য চৰকাৰৰ এইটো এক বৃহৎ সাফল্য বুলি মুখ্য মন্ত্ৰীয়ে উল্লেখ কৰে।
আনহাতে ৰাজ্যৰ চৰকাৰী বিদ্যালয় সমূহত বিদ্যায়তনিক দিশত সামগ্ৰিক উত্তৰণ, স্বচ্ছতা তথা শিক্ষক-শিক্ষয়িত্ৰী সকলৰ বাবে মুখ্য মন্ত্ৰীৰ বিশেষ শিক্ষক বঁটা প্ৰদান কৰা হ’ব।
ৰাজ্যৰ ৪৩৭৯ খন ছেকেণ্ডাৰী বিদ্যালয় (দশম অথবা দ্বাদশ পৰ্যায়) লৈ ক্ৰীড়া আৰু শাৰিৰীক শিক্ষা অনুদানৰ ২৫ হাজাৰ টকাকৈ ৰাজ্যিক পৰ্যায়ৰ এক অনুষ্ঠানৰ জৰিয়তে ফেব্ৰুৱাৰিৰ প্ৰথম সপ্তাহত প্ৰদান কৰা হ’ব বুলি কোৱাৰ লগতে বাৰ্ষিক কম্পোজিত স্কুল অনুদান ১ লাখ টকালৈকে এই অনুষ্ঠানতে প্ৰদান কৰা হ’ব বুলি মুখ্য মন্ত্ৰীয়ে কয়।
এই বৈঠকতে চাহ বাগিচা এলেকাত থকা ১০০ খন বিদ্যালয়ৰ প্ৰাদেশীকৰণৰ বিষয়েও আলোচনা কৰে।
বৈঠকত শিক্ষা মন্ত্ৰী সিদ্ধাৰ্থ ভট্টাচাৰ্য, শিক্ষা বিভাগৰ দায়িত্বত থকা অতিৰিক্ত মুখ্য সচিব মনিন্দৰ সিং, মুখ্য মন্ত্ৰীৰ প্ৰধান সচিব সঞ্জয় লোহিয়া, প্ৰাথমিক আৰু মাধ্যমিক শিক্ষা বিভাগৰ আয়ুক্ত সচিব প্ৰীতম শইকীয়াৰ লগতে শিক্ষা বিভাগৰ জ্যেষ্ঠ বিষয়া সকল উপস্থিত থাকে।
