চৰকাৰে মাওবাদী সজাই কাৰাৰুদ্ধ কৰি ৰাখিলেও CAA-বিৰোধী আন্দোলনৰ শক্তিশালী নেতা কাৰাৰুদ্ধ অখিল গগৈৰ বৃহৎ প্ৰতিকৃতিয়ে ঠাই পাইছে নতুন দিল্লীৰ এখন বিশ্ববিদ্যালয়ৰ ৱালত।
জানিব পৰামতে, নতুন দিল্লীৰ জামিয়া মিলিয়া ইছলামীয়াৰ শিক্ষাৰ্থীয়ে অসমৰ কৃষক নেতাজনৰ graffiti অংকন কৰিছে।
কেন্দ্ৰীয় বিশ্ববিদ্যালয়খনৰ শিক্ষাৰ্থীসকলে নাগৰিকত্ব সংশোধনী আইনৰ বিৰোধিতা কৰি নেতাজনৰ এই ৱাল আৰ্ট প্ৰস্তুত কৰা বুলি জানিব পৰা গৈছে।
এই ৱাল আৰ্টক লৈ চৰ্চা হৈছে যদিও বিশ্ববিদ্যালয় কৰ্তৃপক্ষ বা প্ৰশাসনৰ কোনো মন্তব্য চকুত পৰা নাই।
বিতৰ্কিত নাগৰিকত্ব (সংশোধন) আইনখনৰ বিৰোধিতা কৰাৰ লগতে শিক্ষাৰ্থীসকলে অখিল গগৈৰ মুক্তিৰ দাবীও তুলিছে।
গগৈক যোৱা ১৪ ডিচেম্বৰত এন আই এই য়ু এ পি এ-ৰ অধীনত গ্ৰেপ্তাৰ কৰিছিল। বৰ্তমান ন্যায়িক জিম্মাত আছে কৃষক মুক্তিৰ নেতাজন।
গগৈক যোৱা ১০ জানুৱাৰিত NIA-ই পুনৰ নিজৰ জিম্মাত বিচাৰিছিল যদিও বিমুখ কৰে বিশেষ ন্যায়াধীশৰ আদালতে।
