চীনত অব্যাহত থকা ক’ৰ’না ভাইৰাছৰ সংহাৰৰ সময়ত দেশখনৰ বুহান প্ৰদেশত বন্দী হৈ থকা ভাৰতীয় লোকসকলক লৈ ভাৰতত উপস্থিত হৈছে এয়াৰ ইণ্ডিয়াৰ ডবল ডেকাৰ জম্বো ৭৪৭ বিমান।
শুকুৰবাৰে নিশা ৪২৩ গৰাকী যাত্ৰীক লৈ এয়াৰ ইণ্ডিয়াৰ বিমানখনে চীনৰ বুহানৰ পৰা ভাৰত অভিমুখে উৰা মাৰিছিল।
বিমানখনত দিল্লীৰ ৰাম মনোহৰ লোহিয়া হস্পাতালৰ পাঁচ গৰাকী চিকিৎসকৰ দল এটাও মজুত আছিল।
চিকিৎসকৰ দলটোৰ উপৰিও পেৰা মেডিকেল দলো উপস্থিত আছিল।
ইয়াৰোপৰি, ভাৰতীয় চিকিৎসকৰ দলটোৱে পাঁচবিধ প্ৰয়োজনীয় ঔষধ, মাস্ক আদি সামগ্ৰীও লৈ গৈছিল।
চীনৰ পৰা ভাৰতীয় লোকসকলক লৈ শুকুৰবাৰে নিশা উৰা মৰা বিমানখনে শনিবাৰে ৰাতিপুৱা ৭ বজাত নতুন দিল্লীত উপস্থিত হয়।
উল্লেখযোগ্য যে, চীনৰ বুহান প্ৰদেশৰ প্ৰান্তীয় ৰাজধানী হুবেই ক’ৰ’না ভাইৰাছ সংক্ৰমণৰ মুখ্য অঞ্চল হিচাপে বিবেচিত হৈছে।
জানিব পৰা মতে, উক্ত অঞ্চলত ভাৰতৰ প্ৰায় ৭০০ গৰাকী লোক আছে।
এই ৭০০ গৰাকী ভাৰতীয় লোকৰ ভিতৰত অধিকাংশই চিকিৎসা বিজ্ঞানৰ ছাত্ৰ আৰু গৱেষক ছাত্ৰ।
নিউজ এজেঞ্চি পিটিআইৰ ৰিপোৰ্ট অনুসৰি ইতিমধ্যে বহু ভাৰতীয় ছাত্ৰই উৎসৱ আৰু ছুটীৰ বাবে নিজৰ দেশলৈ উভতি আহিছে।
চীনৰ বুহান প্ৰদেশৰ বিমান বন্দৰ সাময়িকভাৱে বন্ধ কৰি ৰখা হৈছিল যদিও চীনত আবদ্ধ হৈ থকা বিভিন্ন দেশৰ যাত্ৰীসকলক নিজ নিজ দেশলৈ ওভটাই অনাৰ বাবে বিমান বন্দৰটো মুকলি কৰি দিয়া হৈছিল।
চীনৰ পৰা আহি ভাৰতত উপস্থিত হোৱা ৪২৩ গৰাকী লোকৰ আজি শৰীৰৰ পৰীক্ষণ সম্পন্ন কৰা হ’ব।
