বোকাখাতৰ ৰজাবাৰীত আজি ৰাতিপুৱা বোকাখাত আৰক্ষীৰ যানবাহন শাখাই এখন চুৰি বলেৰ’ পিকআপ ভ্যান জব্দ কৰে৷
ফাইবাৰ প্লেটত লিখি আঠা দি নম্বৰ প্লেট লগাই অনা এনএল-০৭এ-৮৬১৮ নম্বৰৰ পিকআপ ভ্যানখন পৰিতক্ত অৱস্থাত আৰক্ষীয়ে জব্দ কৰে৷
বাহনখনৰ প্ৰকৃত নম্বৰটো বাহনৰ বডিত লিখা আছিল যদিও চোৰে সেই নম্বৰৰ ওপৰত ক’লা ৰং সানি দিছিল৷
ক’লা ৰং আতৰাই দিয়াত বাহনখনৰ প্ৰকৃত নম্বৰ এএছ-০২বিচি-৭৮৬৮ ওলাই পৰে৷
আনহাতে, বাহনখনৰ প্ৰকৃত নম্বৰৰ পৰা বাহনখনৰ গৰাকী নগাঁৱৰ আকলিমা বেগম বুলি জানিব পৰা গৈছে৷
ইপিনে, পিকআপ ভ্যানখনত এখন নকল আৰ চিও উদ্ধাৰ হৈছে য’ত বাহনখনত ফাইবাৰ প্লেটেৰে ব্যৱহাৰ কৰা নম্বৰৰ বিপৰীতে ডিমাপুৰৰ নতুন বস্তিৰ ৱাই কিকন নামৰ এজন ব্যক্তিৰহে নাম পোৱা গৈছে৷
জব্দ কৰা পিকআপ ভ্যানখন বোকাখাত আৰক্ষী থানালৈ আনি সম্প্ৰতি অধিক তথ্যৰ বাবে অনুসন্ধান আৰম্ভ কৰিছে যানবাহন আৰক্ষীয়ে৷
ইফালে দেওবাৰে নিশা বোকাখাতৰ আৰক্ষীয়ে চোৰাং কাঠ ভৰ্তি এখন পিকআপ ভ্যানো জব্দ কৰিছে৷
চোৰাং কাঠ কঢ়িয়াই অনা গাড়ীখন বোকাখাতৰ ম’হ মাইকী গাঁওৰ আমকা জয়চোৱালৰ বুলি আৰক্ষীয়ে জনাইছে৷
উল্লেখযোগ্য যে, বোকাখাতত বন বিভাগে নহয় বনধ্বংশ প্ৰতিৰোধৰ বাবে আৰক্ষীয়েহে পদক্ষেপ গ্ৰহণ কৰিছে৷
