আগন্তুক নিৰ্বাচনৰ পূৰ্বেই অসমৰ বিধানসভা আৰু লোকসভা সমষ্টিৰ সীমা পুনৰ নিৰ্ধাৰণ কৰা হ’ব।
আইন আৰু ন্যায় মন্ত্ৰ্যালয়ৰ এই প্ৰস্তাৱটোত ৰাষ্ট্ৰপতি কোবিন্দে সন্মতি প্ৰদান কৰাৰ পিছতে এইটো নিশ্চিত হয়।
দেশৰ আইন আৰু ন্যায় মন্ত্ৰ্যালয়ে জনাইছে যে ২০০৮ চনত সীমা পুনৰ নিৰ্ধাৰণ কৰিবলৈ ৰৈ যোৱা অসমকে ধৰি ৪খন ৰাজ্যৰ সীমা নতুনকৈ নিৰ্ধাৰণ কৰা হ’ব।
এই ৰাজ্যকেইখন হ’ল- অসম, অৰুণাচল প্ৰদেশ, মণিপুৰ আৰু নাগালেণ্ড।
লোকসভা নিৰ্বাচন আৰু বিধানসভা নিৰ্বাচনৰ বাবে প্ৰতিখন ৰাজ্য আৰু কেন্দ্ৰশাসিত অঞ্চলৰ ৰাজনৈতিক ভাগবোৰক অঞ্চলভিত্তিক নিৰ্বাচনী সমষ্টি (territorial constituencies)ত ভাগ কৰিবলৈ সীমা পুনৰ নিৰ্ধাৰণ আইন, ২০০২-ৰ অধীনত গঠিত সীমা পুনৰ নিৰ্ধাৰণ আয়োগ গঠন কৰা হৈছিল। এই আয়োগে ২০০১ চনৰ লোকপিয়লৰ ভিত্তিত দেশৰ আন ৰাজ্যবোৰৰ সমষ্টিবোৰ এইদৰে সীমা পুনৰ নিৰ্ধাৰণ কৰে, যিটো প্ৰক্ৰিয়া ২০০৮ চনত সম্পূৰ্ণ কৰা হয়।
কিন্তু ৮ ফেব্ৰুৱাৰি, ২০০৮-ৰ এটা নিৰ্দেশ যোগে সেই সময়ত এই ৰাজ্যকেইখনৰ আইন-শৃংখলা আৰু নিৰাপত্তাৰ দিশ উন্নত নোহোৱাৰ দোহাই দি পৰৱৰ্তী সময়লৈ এই কাম স্থগিত ৰখা হৈছিল।
ৰাষ্ট্ৰপতি কোবিন্দে এই কাৰকবোৰ উন্নত হোৱা বুলি বিশ্বাসৰ ভিত্তিত এই প্ৰক্ৰিয়া উপৰোক্ত ৰাজ্যকেইখনত আৰম্ভ কৰাৰ অনুমতি দিয়ে।
“ৰাষ্ট্ৰপতি এই কথাত বিশ্বাসী যে স্থগিত ৰখাৰ পৰিস্থিতিবোৰ এতিয়া নাই। গতিকে অনুগ্ৰহ কৰি ৮ ফেব্ৰুৱাৰি, ২০০৮-ৰ নিৰ্দেশটো ৰদ কৰা হওক”, নিৰ্দেশটোত কোৱা হয়।
এটা সূত্ৰৰ মতে অসমৰ লোকসভা আৰু বিধানসভাৰ নিৰ্বাচনী সমষ্টিৰ সংখ্যা বৰ্তমানৰ সৈতে একে থাকিব।
