তিনিচুকীয়া সদৰ থানাত হাজিৰ হোৱাৰ নিৰ্দেশ জ্যেষ্ঠ সাংবাদিক মনজিত মহন্তক৷
তিনিচুকীয়া থানাত জ্যেষ্ঠ সাংবাদিক মনজিত মহন্তৰ বিৰুদ্ধে ৰুজু হোৱা “ৰাষ্ট্ৰদ্ৰোহ”ৰ গোচৰৰ সোধাপোছা কৰিবলৈ তদন্তকাৰী বিষয়াৰ ওচৰত উপস্থিত থাকিবলৈ তিনিচুকীয়া থানাই পুনৰ নতুন জাননী প্ৰেৰণ কৰিছে ৷
সেই মৰ্মেই অহা ৭ মাৰ্চ তাৰিখে দিনৰ ১২.৩০ বজাত তিনিচুকীয়া থানাত উপস্থিত হবগৈ মনজিত মহন্ত ৷ নিজৰ ফেচবুক পোষ্টত এই কথা উল্লেখ কৰে সাংবাদিক গৰাকীয়ে।
আমাৰ বিৰুদ্ধে চৰকাৰৰ অভিযোগ- আমি হেনো “ৰাষ্ট্ৰৰ বিৰুদ্ধে যুদ্ধ ঘোষণা” কৰিছোঁ, “কৰ্তব্যৰত চৰকাৰী বিষয়া/কৰ্মচাৰীক শাৰীৰিকভাৱে অপদস্থ” কৰিছোঁ, “ৰাইজক ৰাষ্ট্ৰৰ বিৰুদ্ধে যুদ্ধ ঘোষণা কৰিবলৈ উচটনি” দিছোঁ… ইত্যাদি৷” নিজৰ ফেচবুক পোষ্টত এইদৰে লিখে মহন্তই।
ৰাষ্ট্ৰৰ বিৰুদ্ধে যুদ্ধ ঘোষণা কৰাৰ অভিযোগেৰে মহন্তৰ বিৰুদ্ধে তিনিচুকীয়া সদৰ থানাত ১৫৮/২০২০ নম্বৰত CRPC ৰ 120 (B), 121 (A), 121, 294, 353, 505, আৰু 34 ৰ অধীনত গোচৰ ৰুজু হৈছিল বুলি জানিব পৰা গৈছে।
নিজৰ ফেচবুক পোষ্টত তেওঁ আৰু লিখে “আগেয়েও কৈছোঁ, আজি আকৌ ক’ম- ভাৰতীয় সংবিধান উলংঘা কৰি শাসন চলোৱা শাসকৰ বিৰুদ্ধে শান্তিপূৰ্ণ আৰু গণতান্ত্ৰিক উপায়েৰে প্ৰতিবাদ সাব্যস্ত কৰা বা মুক্তকণ্ঠে মাত মতাটো যদি মোডী চৰকাৰৰ চকুত “ৰাষ্ট্ৰৰ বিৰুদ্ধে যুদ্ধ ঘোষণা” কৰা হয় তেনে “ৰাষ্ট্ৰদ্ৰোহ” আমি বাৰম্বাৰ কৰিবলৈও ভয় নকৰোঁ৷”
“কেৱল ক্ষমতাত বৰ্তি থকাৰ স্বাৰ্থত নিজৰ জাতিক চৰম বিশ্বাসঘাতকতা কৰা সৰ্বানন্দ, হিমন্ত, অতুল, কেশৱ, ফণী, চন্দ্ৰমোহন, বীৰেনহঁতৰ জাতিদ্ৰোহিতাৰ বিৰুদ্ধে জনগণক সংগঠিত কৰাটো যদি “ৰাইজক ৰাষ্ট্ৰৰ বিৰুদ্ধে উচটনি” দিয়া হয়, তেনে “উচটনি” নমৰালৈকে দি যাম৷ আমি সত্য আৰু ন্যায়ৰ পক্ষত থিয় হ’বলৈ তহঁতবোৰৰ অনুমতি লোৱা নাই আৰু নলওঁ কাহানিও৷ মোডী, অমিত শ্বাহহঁত তহঁতবোৰৰ লগত আছে, কিন্তু গৰিষ্ঠসংখ্যক ৰাইজ আছে আমাৰ লগত৷ ৰঙা চকুক ভয় কৰা মানুহ আমি নহয়৷” তেওঁ এইদৰে লিখি কয়।
উল্লেখযোগ্য যে , গীতানগৰ থানা”ত এই একেটা গোচৰতে হাজিৰ হ’বলৈ তিনিচুকীয়া সদৰ থানাই “ভুলক্ৰমে” মহন্তলৈ জাননী জাৰি কৰিছিল৷
মহন্তৰ সৈতে তিনিচুকীয়ালৈ যাব গুৱাহাটী উচ্চ ন্যায়ালয়ৰ শান্তনু বৰঠাকুৰ আৰু বিক্ৰম ৰাজখোৱাৰ লগতে অন্যান্য কেইবাজনো সতীর্থ।
