চীনৰ ঝেজিয়াঙৰ টাইঝৌৰ এজন ২১ বছৰীয়া যুৱকে বিনামূলীয়াকৈ থাকিবলৈ আৰু ধন লাভ কৰিবলৈ বিভিন্ন হোটেলত কেলেংকাৰী সংঘটিত কৰাৰ এক আশ্বৰ্যকৰ খবৰ পোহৰলৈ আহিছে।
জানিব পৰা মতে যুৱকজনৰ নাম জিয়াং। তেওঁ কলেজৰ টিউচনৰ টকাখিনি ভ্ৰমণৰ বাবে ব্যয় কৰে।
কলেজৰ টিউচনৰ টকাখিনিয়েই বিশ্ববিদ্যালয়ৰ খৰচ বহন কৰাৰ পৰিৱৰ্তে ভ্ৰমণৰ বাবে ব্যৱহাৰ কৰিছিল। সেই টকা খৰচ কৰি শেষ হ’লে তেওঁ বিভিন্ন হোটেলত ছলনাৰে ব্লেকমেইল কৰি বিনামূলীয়াকৈ থকা খোৱাৰ সুবিধা আদায় কৰিছিল।
জিয়াঙে বিভিন্ন হোটেলত থাকি নিজেই গোপনে হোটেলৰ কোঠাবোৰত পঁইতাচোৰা, ব্যৱহৃত কণ্ডম, চুলি, পোক-পৰুৱা আদি বস্তু ৰাখিছিল। তাৰপিছত তেওঁ নাটকীয়ভাবে হোটেল কৰ্তৃপক্ষৰ বিৰুদ্ধে অভিযোগ উত্থাপন কৰি হোটেলত বিনামূলীয়াকৈ থকা-খোৱাৰ সুবিধা গ্ৰহণ কৰিছিল।
প্ৰায় ১০ মাহ ধৰি তেওঁ এনেধৰণৰ কাৰ্যকলাপ চলাইছিল। কেতিয়াবা এদিনতে একাধিক হোটেলত থাকিছিল। এই কৌশলটো তেওঁ বিনামূলীয়াকৈ থাকিবলৈ বা টকা দাবী কৰিবলৈ ব্যৱহাৰ কৰিছিল।
কিন্তু ২০২৪ চনৰ ৮ আগষ্টত জিয়াঙৰ এই কৌশল ধৰা পৰে। এখন হোটেলৰ পৰা তেওঁ ৪০০ য়ুহান টকা দাবী কৰিবলৈ চেষ্টা কৰোঁতে হোটেলৰ মেনেজাৰে আৰক্ষীক খবৰ দিয়ে।
আৰক্ষীয়ে তদন্ত কৰাৰ সময়ত জিয়াঙৰ বেগত মৃত পঁইতাচোৰা আৰু ব্যৱহৃত কণ্ডম থকা ২৩টা পেকেট উদ্ধাৰ কৰে।
২০২৩ চনৰ নৱেম্বৰৰ পৰা তেওঁ ৩৮০খন হোটেলত থকাৰ কথা পোহৰলৈ আহে।
ইয়াৰে ৬৩খন হোটেলৰ পৰা কুকৌশলেৰে ৩৮ হাজাৰ য়ুহান টকা লাভ কৰা বুলি স্বীকাৰ কৰিছে জিয়াঙে। জিয়াঙে আৰু কিমান কেলেংকাৰী কৰিছে সেই বিষয়ে জানিবলৈ এতিয়া আৰক্ষীয়ে পাঁচখন ভিন্ন প্ৰদেশৰ হোটেলৰ সৈতে যোগাযোগ কৰিছে।
