গাজা যুদ্ধত ইজৰাইল সেনাৰ সদস্য এজন ভাৰতীয় যুৱক গুলীবিদ্ধ হৈ মৃত্যুমুখত পৰিছে। পেলেষ্টাইনৰ অংশ গাজা ষ্ট্ৰিপত ইজৰাইলে অভিযান চলাই আছে। এই সংঘাতত লিপ্ত হৈছে পেলেষ্টাইনী সংগঠন হামাছ। এই সংগঠনটোক কেইবাখনো দেশে সন্ত্ৰাসবাদী হিচাপে তালিকাভুক্ত কৰিছে। ইজৰাইল-হামাছৰ সংঘাতত হাজাৰ হাজাৰ লোকৰ মৃত্যু ঘটিছে।
ইজৰাইলী সেনাই প্ৰকাশ কৰা অনুসৰি গাজাত হামাছৰ সৈতে সংঘৰ্ষত নিহত ভাৰতীয়জনৰ নাম গেৰী লালৰুৱাকিমা জোলাট। তেওঁ মিজো জনগোষ্ঠীৰ যুৱক।
বাতৰি অনুসৰি, মৃত যুৱকজন মিজোৰামৰ বাসিন্দা। মিজোৰামৰ এই যুৱক ইজৰাইল প্ৰতিৰক্ষা বাহিনীৰ ষ্টাফ চাৰ্জেণ্ট। গাজাৰ যুদ্ধত আন তিনিজন সহকৰ্মীৰ সৈতে তেওঁৰ মৃত্যু হয়। ২১ বছৰীয়া লালৰুৱাকিমা জোলাটক সামৰিক সন্মানেৰে ইজৰাইল চৰকাৰে শেষ শ্ৰদ্ধাঞ্জলি জনায়।
লগতে পঢ়কঃ বিশ্বক দেখুৱাব পথ! কাৰ্বন নিৰ্গমন হ্ৰাস কৰাৰ বাবে ভূটানৰ নেতৃত্বত গঠন নতুন মঞ্চ ‘জি-জিৰ’
ইজৰাইলৰ সেনাই জনোৱা মতে, সোমবাৰে ৯২ নং বেটেলিয়ন কেফিৰ ব্ৰিগেডৰ কমাণ্ডাৰ ষ্টাফ চাৰ্জেণ্ট গেৰী লালৰুৱাকিমা জোলাটে উত্তৰ গাজা ষ্ট্ৰিপত যুদ্ধ কৰি আছিল। ইজৰাইলৰ মিজো সম্প্ৰদায়ৰ পৰা তেওঁ হামাছ বিৰোধী সংঘৰ্ষত নিহত হোৱা প্ৰথমজন ব্যক্তি।
বাতৰি অনুসৰি, ২০০৩ চনত অসমৰ চুবুৰীয়া ৰাজ্য মিজোৰামৰ কোলাচিব চহৰত জন্মগ্ৰহণ হৈছিল লালৰুৱাকিমা জোলাটৰ। তেওঁৰ পিতৃ ডাগান জোহমিংথাংগা জোলাটে ২০০৬ চনত পৰিয়ালটোৰ সৈতে ইজৰাইললৈ গুচি যায়। তাত তেওঁলোকে ইজৰাইলৰ নাগৰিকত্ব লাভ কৰে।
লগতে পঢ়কঃ চেঞ্চুৰিয়ানত চেঞ্চুৰি তিলকৰ; দক্ষিণ আফ্ৰিকাৰ বিৰুদ্ধে টিম ইণ্ডিয়াৰ দুৰ্দান্ত জয়, ছিৰিজত অগ্ৰগতি
দগান জোহমিংথাংগা জোলাটৰ চাৰিটা সন্তান। মৃত লালৰুৱাকিমাৰ জ্যেষ্ঠ ভগ্নীসকলেও ইজৰাইলৰ সেনাবাহিনীত কৰ্মৰত হৈ আছে।
