প্লাষ্টিকৰ ফিটা আৰু নিজৰ শিল্প নৈপুণ্যতাৰে অৰ্থনৈতিক ভেটি গঢ়িছে ৰংজুলিৰ যুৱক মাইকেল মোমিনে। ৰংজুলিৰ বুদুলুং গাৰোপাৰা নিবাসী মাইকেল আৰু তেওঁৰ পত্নী মেৰী লিণ্ডাল মাৰাক’ৰ সৈতে লগ লাগি ২০১২ চনৰ পৰাই প্লাষ্টিক ফিটাৰে ঘৰতে বনাই আহিছে বিভিন্ন আকাৰৰ বেগ, বিচনী, ঢাৰি, তামোল-পাণৰ বঁটা, ফুলদানি, খাৰ’ৰ ফিল্টাৰ, ডলা, দুকুলি ইত্যাদি।
বিশেষকৈ আটকধুনীয়া বেগ’ৰ বাবেই জনপ্ৰিয় এতিয়া এই হাল শিল্পী দম্পতী। তেওঁলোকে তৈয়াৰ কৰা বেগ সমূহে ৰংজুলি, গোৱালপাৰাৰ উপৰিও মেঘালয়ৰ ৰাজধানী শ্বিলং, তুৰা, উইলিয়াম নগৰ, খাৰখুটা, আদোকগিৰী, মেন্দিপথাৰ আদি চহৰ-নগৰতো ব্যাপক চাহিদা লাভ কৰিছে।
একোটা বেগ ১৫০ টকাৰ পৰা ১০০০ টকালৈ বিক্ৰী কৰা মাইকেলে ইয়াৰ দ্বাৰা যথেষ্ট লাভবান হৈছে। নিবনুৱা সমস্যাই যুৱ চামক কোঙা কৰি অনা ৰাজ্যখনত এই হস্তশিল্পই যুৱ প্ৰজন্ম জীৱিকাৰ পথ নিৰ্ণয় কৰিব পাৰে। সেয়ে তেওঁ নৱ প্ৰজন্মক প্ৰশিক্ষণ দিয়াৰো ব্যৱস্থা কৰিছে।এই হস্তশিল্পৰ এখন উপযুক্ত বজাৰ থকাৰ প্ৰতি লক্ষ্য কৰি প্লাষ্টিকৰ ফিটাৰ বেগ তৈয়াৰ কৰি যুৱক-যুৱতীসকল স্বাৱলম্বী হোৱাৰ ব্যাপক সম্ভাৱনা আছে বুলি তেওঁ জানিবলৈ দিয়ে।
