পশ্চিম বংগৰ উত্তৰ ২৪ পৰগনাৰ বাদুড়িয়াত এক হৃদয়বিদাৰক পথ দুৰ্ঘটনা সংঘটিত হৈছে। এই ভয়ংকৰ দুৰ্ঘটনাত কুমাৰেশ মণ্ডল নামৰ এজন চাইকেল আৰোহীৰ কৰুণ মৃত্যু হয়।
অভিযোগ অনুসৰি এখন দ্ৰুতবেগী গাড়ীয়ে তেওঁক খুন্দা মৰাৰ পিছত প্ৰায় ১০ কিলোমিটাৰ দূৰলৈ চোঁচৰাই লৈ যায়। স্থানীয় ৰাইজে চিঞৰ-বাখৰ কৰি গাড়ীখন ৰখাবলৈ চেষ্টা কৰিছিল যদিও চালকজনে গাড়ী নৰখাই পলাই যাবলৈ চেষ্টা কৰে। অৱশেষত এখন সৰিয়হ পথাৰত গাড়ী আৰু চাইকেলখন পেলাই থৈ চালকজনে তাৰ পৰা চম্পট দিয়ে।
এই ঘটনাটো বাদুড়িয়াৰ উমাপতিপুত সংঘটিত হৈছিল। মঙলবাৰে নিশা কুমাৰেশে চাইকেলেৰে ঘৰলৈ উভতি আহি থকাৰ সময়তে বিপৰীত দিশৰ পৰা অহা এখন তীব্ৰবেগী গাড়ীয়ে তেওঁক জোৰেৰে খুন্দা মাৰে। প্ৰত্যক্ষদৰ্শীৰ মতে কুমাৰেশে ৰাস্তাৰ একেবাৰে কাষেদিয়েই গৈ আছিল। গাড়ীখনৰ গতি ইমানেই বেছি আছিল যে চাইকেলসহ কুমাৰেশ গাড়ীখনৰ সন্মুখৰ ভাগত আৱদ্ধ হৈ পৰে। তেনে অৱস্থাতে চালকজনে গাড়ীখন নৰখাই বৰঞ্চ গতিহে বঢ়াই দিয়ে। একাংশ স্থানীয় লোকে বাইকেৰে গাড়ীখন খেদি গৈছিল যদিও তীব্ৰ গতিৰ বাবে তাক ধৰিবলৈ সক্ষম নহ’ল।
প্ৰায় ১০ কিলোমিটাৰ পথ চোঁচৰাই নিয়াৰ পিছত চালকজনে আহত আৰোহীজনক এটা সৰিয়হ পথাৰত পেলাই থৈ পলাই যায়। গুৰুতৰভাৱে আঘাতপ্ৰাপ্ত কুমাৰেশক প্ৰথমে ৰুদ্ৰপুৰ গ্ৰামীণ হাস্পতালত ভৰ্তি কৰা হয় যদিও পাছত অৱস্থা অধিক সংকটজনক হোৱাত আৰ জি কৰ মেডিকেল কলেজলৈ স্থানান্তৰ কৰা হয়। তাত চিকিৎসাধীন অৱস্থাত বুধবাৰে পুৱা তেওঁৰ মৃত্যু ঘটে। বাদুড়িয়া আৰক্ষীয়ে ইতিমধ্যে দুৰ্ঘটনাগ্ৰস্ত গাড়ী আৰু চাইকেলখন জব্দ কৰিছে। সিসিটিভি ফুটেজ আৰু গাড়ীৰ নম্বৰৰ জৰিয়তে পলাতক চালকজনক কৰায়ত্ত কৰিবলৈ আৰক্ষীয়ে তদন্ত আৰম্ভ কৰিছে। এই মৰ্মান্তিক ঘটনাই সমগ্ৰ অঞ্চলটোতে তীব্ৰ শোক তথা আতংকৰ সৃষ্টি কৰিছে।
