অৱশেষত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ হাতত পৰিল শান্তিৰ নোবেল বঁটা। অৱশ্যে এই বঁটা তেওঁক নোবেল সমিতিয়ে দিয়া নাই, বৰঞ্চ ভেনিজুৱেলাৰ বিৰোধী নেত্ৰী মাৰিয়া কাৰিনা মাচাডোৱে নিজৰ বঁটাটো ট্ৰাম্পক উপহাৰ হিচাপে অৰ্পণ কৰিছে। ২০২৫ চনত শান্তিৰ নোবেল বঁটা লাভ কৰা মাচাডোৱে পূৰ্বেই ঘোষণা কৰিছিল যে তেওঁ নিজৰ এই সন্মানীয় বঁটাটো আমেৰিকাৰ ৰাষ্ট্ৰপতিগৰাকীক দিব বিচাৰে। সেই অনুসৰি যোৱা বৃহস্পতিবাৰে হোৱাইট হাউছত ট্ৰাম্পক সাক্ষাৎ কৰি তেওঁ নিজৰ পদকটো ৰাষ্ট্ৰপতিগৰাকীৰ হাতত তুলি দিয়ে।
মাচাডোৰ মতে ট্ৰাম্প এই বঁটাৰ বাবে আটাইতকৈ উপযুক্ত ব্যক্তি। তেওঁ কয় যে ভেনিজুৱেলাৰ স্বাধীনতাৰ বাবে ট্ৰাম্পে যি পদক্ষেপ গ্ৰহণ কৰিলে, তাৰ বাবে তেওঁ এই সন্মানৰ যোগ্য। উল্লেখ্য যে অলপতে আমেৰিকাৰ সেনাই ভেনিজুৱেলাত অভিযান চলাই ৰাষ্ট্ৰপতি নিকোলাছ মাদুৰোক গ্ৰেপ্তাৰ কৰিছিল। মাচাডোৱে এই ঘটনাক ভেনিজুৱেলাৰ স্বাধীনতাৰ এক নতুন আৰম্ভণি বুলি অভিহিত কৰিছে। যদিও বহুতে ভাবিছিল যে ট্ৰাম্পে মাচাডোক ভেনিজুৱেলাৰ পৰৱৰ্তী ৰাষ্ট্ৰপতি হিচাপে বিচাৰিব, কিন্তু ট্ৰাম্পে মাদুৰোৰ সহযোগী ডেলচি ৰড্ৰিগেজৰ সৈতে কাম কৰিবলৈহে আগ্ৰহ প্ৰকাশ কৰে। ইয়াৰ পিছতে ডেলচিয়ে ভেনিজুৱেলাৰ নতুন ৰাষ্ট্ৰপতি হিচাপে শপত গ্ৰহণ কৰে।
কাৰ্যভাৰ গ্ৰহণৰ দহ দিনৰ পিছত মাচাডোৱে হোৱাইট হাউছত ট্ৰাম্পক লগ কৰে আৰু অত্যন্ত আবেগিকভাৱে নিজৰ নোবেল বঁটাটো তেওঁক অৰ্পণ কৰে। সাংবাদিকৰ সন্মুখত তেওঁ কয় যে ভেনিজুৱেলাৰ স্বাধীনতাক স্বীকৃতি দিয়াৰ বাবে তেওঁ ট্ৰাম্পক এই সন্মান দিছে। নোবেল বঁটাটো হাতত লৈ আমেৰিকাৰ ৰাষ্ট্ৰপতিগৰাকীয়েও এক বিৰল হাঁহি মাৰি কয় যে তেওঁ কৰা কামৰ বাবেই মাচাডোৱে এই বঁটা পাইছিল আৰু এতিয়া সেইটো তেওঁক উপহাৰ দিছে। জানিব পৰা মতে ট্ৰাম্পে এই পদকটো নিজৰ ওচৰতে ৰাখিব। উল্লেখ্য যে ২০২৫ চনৰ আচল নোবেল বঁটাটো পোৱাৰ বাবে ট্ৰাম্পে যথেষ্ট আশা কৰিছিল যদিও সেইবাৰ তেওঁ নিৰাশ হ’বলগীয়া হৈছিল। এতিয়া মাচাডোৰ জৰিয়তে হ’লেও নোবেল বঁটাটো লাভ কৰি ট্ৰাম্প যথেষ্ট সুখী দেখা গৈছে।
