Huge amount of money found at Sri Lanka President’s house আজি শ্ৰীলংকাৰ ভয়াৱহ পৰিস্থিতিৰ কাৰণ হৈছে দেশখনত ধনৰ অভাৱ। কিন্তু ৰাষ্ট্ৰপতি গোটাবায়া ৰাজাপাক্ষেৰ ৰাজপ্ৰসাদত হেনো লুকাই আছে কোটি কোটি টকা। ইমানেই টকা যে গণনা কৰি শেষ কৰিব নোৱাৰি। দ্বীপৰাষ্ট্ৰখনৰ চৰকাৰ বিৰোধী প্ৰতিবাদকাৰীয়ে এনেধৰণৰ চাঞ্চল্যকৰ দাবী উত্থাপন কৰিছিল।
দেওবাৰে প্ৰতিবাদকাৰীয়ে ৰাষ্ট্ৰপতিগৰাকীৰ বাসভৱনত আক্ৰমণ চলায়। তেওঁলোকেই টকাখিনি উদ্ধাৰ কৰা বুলি দাবী কৰিছে। ইতিমধ্যে ছ’চিয়েল মিডিয়াত ভাইৰেল হৈ পৰিছে এটা ভিডিঅ’, য’ত এজন প্ৰতিবাদকাৰীক ৰাজপ্ৰসাদত লুকাই থকা ধন গণনা কৰি থকা দেখা গৈছে।
প্ৰধানমন্ত্ৰীৰ পদত্যাগৰ পিছতো প্ৰতিবাদৰ ঢৌ কমা নাই। শনিবাৰে কলম্বোৰ ৰাজপথলৈ ওলাই আহি প্ৰতিবাদ সাব্যস্ত কৰে লাখ লাখ জনতাই। প্ৰতিবাদকাৰীয়ে ৰাষ্ট্ৰপতি ভৱনতো আক্ৰমণ চলায়। বিক্ষোভৰ উত্তাপ দেখি ৰাষ্ট্ৰপতি গোটাবায়া পলায়ন কৰিবলৈ বাধ্য হয়।
শণিবাৰে ছ’চিয়েল মিডিয়াত ভাইৰেল হৈ পৰে ৰাষ্ট্ৰপতি ভৱনৰ ভিতৰত প্ৰতিবাদকাৰীয়ে আক্ৰমণ চলোৱা একাধিক ভিডিঅ। প্ৰতিবাদকাৰীয়ে দাবী কৰিছে যে সেই সময়ত ৰাজপ্ৰসাদৰ পৰা লাখ লাখ টকা উদ্ধাৰ হৈছে।
শ্ৰীলংকাৰ স্থানীয় সংবাদ সংস্থা ডেইলী মিৰৰে জনোৱা মতে এই ধন নিৰাপত্তা বাহিনীৰ হাতত অৰ্পণ কৰা হৈছে। ঠিক কিমান টকা উদ্ধাৰ কৰা হ’ল, তাৰ তথ্য এতিয়ালৈকে পোৱা হোৱা নাই।
প্ৰতিবাদকাৰীয়ে ধন গণনা কৰি থকা ভিডিঅ’ ভাইৰেল হৈছে ছ’চিয়েল মিডিয়াত। তাৰ পিছত এটা প্ৰশ্নই উত্থাপন হয়, যেতিয়া সমগ্ৰ দেশ আৰ্থিকভাৱে বিধ্বস্ত হৈ পৰিছে, চৰকাৰে সহায় বিচাৰি বিদেশৰ আগত হাত পাতি আছে, তাৰ পিছতো ৰাষ্ট্ৰপতিৰ ঘৰত ইমান টকা কেনেকৈ আহিল?
ইফালে ৰাষ্ট্ৰপতি গোটাবায়া এতিয়া ক’ত আছে এতিয়া কোনেও নাজানে। শ্ৰীলংকাৰ বৰ্তমানৰ চৰকাৰৰ আন দুজন মন্ত্ৰীয়েও পদত্যাগ কৰিছে। যোৱা দুদিনত চাৰিজন মন্ত্ৰীয়ে পদত্যাগ কৰিছে। ইয়াৰ পূৰ্বে প্ৰধানমন্ত্ৰীয়ে পদত্যাগ কৰিছিল।