বোকাখাত মহকুমাৰ ভক্তে চাপৰিৰ উত্তৰে ব্ৰহ্মপুত্ৰ নদীৰ মাজত অৱস্থিত বাঘেখোৱা নামৰ চাপৰিত বুধবাৰৰ দিনা বিয়লি স্থানীয় মাছমৰীয়াই এটা বেগ উদ্ধাৰ কৰে ৷ পানীত উটি আহি বালিত পৰি ৰোৱা অৱস্থাত পাই বগা ৰঙৰ লেডাৰৰ বেগটো ৷
বেগটোৰ ভিতৰত মহিলাই ব্যৱহাৰ কৰা কাপোৰ, এটা নীলা জেকেট, আপেলৰ দুটা টোপোলা, কণমানি এজোৰ চেণ্ডেল আৰু এখন আধাৰ কাৰ্ড পোৱা গৈছে ৷
আধাৰ কাৰ্ডখন যোৰহাট বালি গাওঁৰ নয়নমনি পায়েংৰ বুলি জানিব পৰা গৈছে ৷
Latest News: পূজাৰ বতৰত গ্ৰাহকৰ বাবে SBI ৰ ভাল খৱৰ; চাকৰিয়াল বুলিয়েই নহয়, সকলোৱে পাব এই সুবিধা
পানীত উটি অহি বালিত লাগি থকা বেগটো বুধবাৰৰ দিনা স্থানীয় মাছমৰীয়াই দেখি ভক্তে চাপৰিত থকা পূব অসম বন্যপ্ৰাণী সংমণ্ডলৰ বন শিৱিৰৰ বনকৰ্মীক জনায় ৷
ডি এফ অ’ ৰমেশ কুমাৰ গগৈয়ে বিষয়টো বোকাখাত আৰক্ষীক অৱগত কৰাত বোকাখাত আৰক্ষীয়ে বৃহস্পতিবাৰৰ দিনা বনকৰ্মীৰ সহযোগত যন্ত্ৰচালিত নাৱেৰে গৈ বাঘেখোৱা চাপৰিৰ পৰা সামগ্ৰীৰে সৈতে বেগটো উদ্ধাৰ কৰে ৷
উদ্ধাৰ হোৱা বেগটো নিমাতীৰ শোকাবহ নাও দুৰ্ঘটনাৰে কোনো যাত্ৰীৰ বুলি স্থানীয় লোক আৰু উদ্ধাৰকাৰী দলে সন্দেহ কৰিছে ৷ বেগৰ লগত পোৱা নয়নমনি পায়েঙৰ সন্ধানত বোকাখাত আৰক্ষীয়ে এতিয়া অনুসন্ধান আৰম্ভ কৰিছে ৷
