পৰকীয়া প্ৰেমৰ সন্দেহত নিজৰ পত্নীক এখন বজাৰৰ মাজতে চুৰিকাঘাত কৰি হত্যা কৰাৰ এটা ঘটনা সংঘটিত হৈছে।
দিল্লীৰ ৰোহিনি অঞ্চলত শনিবাৰে সংঘটিত হৈছে হত্যাকাণ্ডটো।
দিল্লী আৰক্ষীয়ে ইতিমধ্যে অভিযুক্ত স্বামীক গ্ৰেপ্তাৰ কৰিছে।
অভিযুক্ত স্বামীজনৰ নাম- হৰিশ মেহতা (৪০) বুলি জানিব পৰা গৈছে।
আনহাতে, তেওঁ হত্যা কৰা পত্নীৰ নাম- নীলু (২৬)।
আৰক্ষীৰ সূত্ৰৰ পৰা জনা গৈছে যে অভিযুক্ত হৰিশৰ প্ৰকৃত ঘৰ গুজৰাটৰ ৰাজকোটত।
তেওঁ দিল্লীত কৰ্মৰত হিচাপে বাস কৰি থকাৰ সময়তে এটা মেট্ৰিমনিয়েল সাইটত নীলুৰ স’তে পৰিচয় হয়।
নীলুৱে এখন চৰকাৰী চিকিৎসালয়ত চাকৰি কৰে।
বিয়াৰ পাছত হৰিশে নীলুক চাকৰি এৰি সংসাৰধৰ্ম পালন কৰিবলৈ মানসিক চাপ দিয়ে।
কিন্তু চাকৰি এৰিবলৈ নীলু ৰাজি নহ’ল।
এই বিষয়টো লৈ তেওঁলোকৰ সংসাৰ অশান্তিকৰ হৈ পৰিবলৈ ধৰিলে।
সংবাদ মাধ্যমৰ আগত আৰক্ষীয়ে কয় যে, বিয়াৰ কিছু দিন পাছতে হৰিশে সন্দেহ কৰিবলৈ আৰম্ভ কৰে যে নীলুৱে আন কোনো পুৰুষৰ স’তে সম্পৰ্ক ৰাখিছে।
পাৰিবাৰিক অশান্তিৰ বাবে বিয়াৰ কিছুদিনৰ পাছতে হৰিশক এৰি নীলুৱে নিজৰ পৈত্ৰিক ঘৰত থাকিবলৈ লয়।
ইয়াৰ বাবে হৰিশৰ খং দুগুণ বৃদ্ধি হয়।
খঙে যেতিয়া সকলো নিয়ন্ত্ৰণ পাৰ কৰি নিয়ে, তেতিয়া হৰিশে নীলুক হত্যা কৰিবলৈ পৰিকল্পনা কৰে।
পৰিকল্পনা অনুযায়ী শনিবাৰে দুপৰীয়া নীলুৱে চাকৰিক্ষেত্ৰৰ পৰা ঘৰলৈ উভটি আহি থাকোতে বুদ্ধ বিহাৰ অঞ্চলৰ এখন বজাৰত খাপ পিটি ৰৈ আছিল হৰিশ।
যেতিয়া নীলুক কাষত পায়, হৰিশে লোকচক্ষুৰ আগতে নীলুক উপৰ্যুপৰি ছুৰিকাঘাত কৰি যাবলৈ ধৰে।
নীলু বাগৰি পৰে আৰু সমগ্ৰ ঘটনাটো উপস্থিত লোকসকলে কেমেৰাত বন্দী কৰে।
সামাজিক মাধ্যমত ঘটনাটোৰ ভিডিঅ’ ভাইৰেল হৈ পৰে।
ভিডিঅ’টোত দেখা গৈছে ৰাস্তাৰ মাজতে পৰি থকা নীলুৰ শৰীৰ তেজেৰে লুতুৰি-পুতুৰি হৈ পৰিছে।
ঘটনাটো সংঘটিত হোৱাৰ পাছতে অঞ্চলটোৰ আৰক্ষী কৰ্মীসকল তাত গৈ উপস্থিত হয়।
নীলুক সঞ্জয় গান্ধী হস্পিতাললৈ প্ৰেৰণ কৰা হয় কিন্তু চিকিৎসকসকলে মৃত ঘোষণা কৰে।
হত্যাকাণ্ডটো সংঘটিত কৰাৰ পাছতে ঘটনাস্থলীৰ পৰা উধাও হয় হৰিশ।
কিন্তু বিচাৰ-খোচাৰ কৰাৰ পাছত আৰক্ষীয়ে হৰিশক আটক কৰে।
বৰ্তমান দিল্লীৰ বিজয় বিহাৰ থানাত আৰক্ষীৰ জিম্মাত থকা হৰিশৰ ওপৰত হত্যাৰ গোচৰ ৰুজু কৰা হৈছে।
