বিগত কিছু দিনৰ পৰা নগাঁও চহৰত বিভিন্ন নাৰী নিৰ্যাতিত ঘটনা ঘটি থকাৰ সময়তে আজি পুনৰ এগৰাকী বিবাহিত মহিলা অগ্নিদগ্ধ হৈ চিকিৎসালয়ত চিকিৎসাধীন হোৱা ঘটনাই সমগ্ৰ নগাঁও চহৰতে তীব্ৰ চাঞ্চল্যৰ সৃষ্টি হোৱা পৰিলক্ষিত হৈছে।
জানিব পৰা মতে, নগাঁও চহৰৰ হয়বৰগাঁও আৰক্ষী চকীৰ অন্তৰ্গত তেলীয়াপট্টিৰ হিমাংশু বণিকে পুত্ৰ ত্ৰিতন বণিকৰ সৈতে লগ হৈ ত্ৰিতনৰ পত্নী তথা বোৱাৰীয়েকক যৌতুক বিচাৰি অত্যাচাৰ চলাই গৈছিল।
শেষত উপায়ন্তৰ হৈ চামগুৰি সোণাৰীবালিৰ পৰা প্ৰায় এবছৰ আগতে বিয়া হৈ অহা বোৱাৰীজনীয়ে আজি নিজেই গাত জুই লগাই আত্মহত্যাৰ চেষ্টা কৰে যদিও পৰিয়ালৰ কোনো লোকে মহিলাগৰাকীক জুই লগা দেখা পাই ১০৮ ৰ জৰিয়তে নগাঁও অসামৰিক চিকিৎসালয়লৈ আনে।
বৰ্তমান নগাঁও অসামৰিক চিকিৎসালয়তে চিকিৎসাধীন হৈ থকা মহিলাগৰাকীৰ খবৰ ল’বলৈ আহি আৰক্ষীৰ হাতত আটক হ’বলগীয়া হয় শহুৰ হিমাংশু বণিক আৰু স্বামী ত্ৰিতন বণিক। বৰ্তমান ঘটনা সন্দৰ্ভত দুয়োজনকে জেৰা চলাই থকা বুলি জানিব পৰা গৈছে।
