অসমৰ সাহিত্য জগতলৈ কঢ়িয়াই আনিছে এক সুন্দৰ খবৰ। প্ৰখ্যাত অসমীয়া ঔপন্যাসিক ডঃ দীপক কুমাৰ বৰকাকতিক চলিত বৰ্ষৰ সন্মানীয় ভাৰতীয় ভাষা পৰিষদ বঁটাৰে সন্মানিত কৰা হৈছে। যোৱা এক মে’ তাৰিখে কলকাতাৰ ভাৰতীয় ভাষা পৰিষদৰ প্ৰেক্ষাগৃহত এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰা হয়। যোৱা দহ এপ্ৰিলত ঘোষণা কৰা এই বঁটাসমূহ আনুষ্ঠানিকভাৱে প্ৰদান কৰাৰ বাবে এই বিশেষ সভাখনৰ আয়োজন কৰা হৈছিল। অসমীয়া ভাষা সাহিত্যলৈ আগবঢ়োৱা অনবদ্য অৱদানৰ বাবে ডঃ বৰকাকতিক পৰিষদৰ তৰফৰ পৰা ‘কৰ্তৃত্ব সমগ্ৰ সন্মান’ আগবঢ়োৱা হয়।
ভাষা পৰিষদৰ সভাপতি ডঃ কুসুম খেমানীৰ পৌৰোহিত্যত অনুষ্ঠিত হোৱা এই বঁটা প্ৰদান অনুষ্ঠানত মুখ্য অতিথি হিচাপে উপস্থিত থাকে বিশিষ্ট বাংলা সাহিত্যিক ডঃ ৰাম কুমাৰ মুখোপাধ্যায়। তেখেত সাহিত্য অকাডেমিৰ পূব মণ্ডলৰ প্ৰাক্তন সচিব তথা বিশ্বভাৰতীৰ গ্ৰন্থন বিভাগৰ প্ৰাক্তন সঞ্চালক আছিল। অনুষ্ঠানটোত ডঃ বৰকাকতিৰ উপৰিও আন তিনিগৰাকী দেশৰ বিশিষ্ট জ্যেষ্ঠ সাহিত্যিকক এই সন্মান প্ৰদান কৰা হয়। তেওঁলোক হ’ল হিন্দী ভাষাৰ নৰেশ ছাক্সেনা, কানাড়া ভাষাৰ বৈদেহী আৰু উৰ্দু ভাষাৰ আনিশ আছফাক।
জ্যেষ্ঠ লেখকসকলৰ লগতে আন চাৰিগৰাকী প্ৰতিশ্ৰুতিসম্পন্ন যুৱ লেখককো অনুষ্ঠানত ‘যুৱ পুৰস্কাৰ’ প্ৰদান কৰা হয়। এই বঁটা লাভ কৰা যুৱ সাহিত্যিকসকল হ’ল হিন্দী ভাষাৰ দিব্য বিজয়, মালয়ালমৰ জিন্ছা গংগা, বাংলাৰ পিয়ুষ সৰকাৰ আৰু গুজৰাটী ভাষাৰ অজয় ছোনী। সভাৰ আৰম্ভণিতে পৰিষদৰ সভাপতি ডঃ কুসুম খেমানীয়ে অনুষ্ঠানটোৰ একান্ন বছৰীয়া বৰ্ণিল ইতিহাসৰ বিষয়ে আলোকপাত কৰে আৰু তাৰ পাছতেই মুখ্য অতিথি ডঃ ৰাম কুমাৰ মুখোপাধ্যায়ে নিজৰ সাৰুৱা ভাষণ আগবঢ়ায়। কলকাতাৰ ৰাছিয়ান দূতাৱাসৰ কনছুলেটেও হিন্দী আৰু বাংলা ভাষাত এই অনুষ্ঠানত বক্তব্য প্ৰদান কৰি সভাৰ সৌষ্ঠৱ বৃদ্ধি কৰে।
বঁটা প্ৰদান আৰু ভাৰতীয় ভাষা পৰিষদৰ প্ৰতিষ্ঠা দিৱসৰ লগত সংগতি ৰাখি এখন বিশেষ আলোচনা চক্ৰৰো আয়োজন কৰা হয়। ‘লেখক : বৈশ্বিক মানৱীয়তা আৰু শান্তি’ শীৰ্ষক এই গুৰুত্বপূৰ্ণ আলোচনা চক্ৰখনত বঁটা বিজয়ী সাহিত্যিকসকলে অংশগ্ৰহণ কৰে। আলোচনা চক্ৰখন সুচাৰুৰূপে সঞ্চালনা কৰে ভাষা পৰিষদৰ সঞ্চালক অধ্যাপক শম্ভুনাথে। আনহাতে, সমগ্ৰ অনুষ্ঠানটো অতি সুন্দৰভাৱে আঁত ধৰে অধ্যাপক ৰাজশ্ৰী শুক্লাই। এই ৰাষ্ট্ৰীয় পৰ্যায়ৰ সন্মানে অসমৰ সাহিত্যিক মহললৈ এক নতুন উৎসাহ কঢ়িয়াই আনিছে।
