বাৰিষাৰ লগে লগে জাপানীজ এনকেফেলাইটছকে ধৰি বিভিন্ন প্ৰকাৰৰ বায়ুৰ পৰা হোৱা বেমাৰৰ প্ৰাদুৰ্ভাৱ পৰিছে মাজুলীতো। জিলাখনৰ এটি কণমানি শিশু জাপানীজ এনকেফেলাইটিছত আক্ৰান্ত হৈ মৃত্যুক আঁকোৱালি লয়।
নিহত কণমানি শিশুটিক মাজুলীৰ পতিয়ৰি গাঁৱৰ নিবাসী চুৰেন বৰা আৰু নিতুমনি বৰাৰ এমহীয়া পুত্ৰ পল্লৱ বৰা বুলি চিনাক্ত কৰা হৈছে।
শিশুটি জাপানীজ এনকেফেলাইটিছত আক্ৰান্ত হৈ যোৰহাট চিকিৎসালয়ত চিকিৎসাধীন হৈ আছিল। কিন্তু অৱশেষত নিয়তিৰ ওচৰত হাৰ মানি কালি অৰ্থাৎ ২১ জুনৰ নিশা শিশুটিয়ে শেষ নিশ্বাস ত্যাগ কৰে।
এই ঘটনাই সমগ্ৰ অঞ্চলটোতে এক শোকাকুল পৰিৱেশ সৃষ্টি কৰাৰ লগতে আতংকিত হৈ পৰিছে মাজুলীবাসী। লগতে পতিয়ৰি, পেৰাভাৰি, চামগুৰি আদি অঞ্চলৰ ৰাইজে জিলাখনৰ স্বাস্থ্য বিভাগে জাপানীজ এনকেফেলাইটিছ ৰোগৰ প্ৰতিকাৰৰ কোনো ব্যৱস্থা গ্ৰহণ নকৰাৰ অভিযোগ তুলিছে।