‘’খিলঞ্জীয়াৰ বাবে অসমত নাই কোনো ৰাজনৈতিক দল। সেয়েহে খিলঞ্জীয়াৰ অস্তিত্ব ৰক্ষা কৰাৰ বাবে গঠন কৰা হ’ব এক ৰাজনৈতিক দলৰ।” গুৱাহাটীৰ প্ৰেছ ক্লাৱত এক সংবাদমেল সম্বোধন কৰি এই কথা ঘোষণা কৰে গুৱাহাটী লোকসভা সমষ্টিৰ নিৰ্দলীয় প্ৰাৰ্থী তথা প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাই।
অহা জুন মাহৰ ভিতৰতে নতুন ৰাজনৈতিক মঞ্চ গঠন কৰা হ’ব বুলিও তেওঁ সংবাদমেলত জনায়।
“অগপ বিজেপি আৰু কংগ্ৰেছে নিজৰ স্বাৰ্থৰ বাবে অসমখনক ধ্বংসৰ পথলৈ ঠেলি দিলে,”-সংবাদমেলত হাজৰিকাই এইদৰে কয়।
আনহাতে, ৰাজনৈতিক দল গঠন কৰা বা নিৰ্বাচনত অৱতীৰ্ণ হৈ এম পি, এম এল এ হোৱাই এই ৰাজনৈতিক দলটোৰ মূল উদ্দেশ্য নহয় বুলি উল্লেখ কৰি তেওঁ কয়, “ইয়াৰ মূল উদ্দেশ্য হৈছে খিলঞ্জীয়াক সুৰক্ষিত কৰিবলৈ আৰু সংখ্যালঘু হোৱাৰ পৰা বচাবলৈ যি ৩ টা অনিবাৰ্য পদক্ষেপ (আইনগত সংৰক্ষণ, এন আৰ চিৰ পুনৰীক্ষণ আৰু নতুন বিদেশীৰ বোজাৰ পৰা মুক্ত কৰা) গ্ৰহণ কৰি খিলঞ্জীয়াৰ অস্তিত্ব সুৰক্ষিত কৰা।”
হাজৰিকাই লগতে কয়,”আমাৰ ফলাফল সেই দিনাহে সম্পূৰ্ণ হ’ব যিদিনা আমাৰ উদ্দেশ্য সমূহ সফল হ’ব।‘’
তদুপৰি, ২০২১ চনৰ বিধানসভা নিৰ্বাচনত গোটেইকেইটা সমষ্টিতে নতুন ৰাজনৈতিক দলটোৱে প্ৰতিদ্বন্দ্বিতা কৰাৰ চেষ্টা কৰিব বুলিও উপমন্যু হাজৰিকাই মন্তব্য কৰে।
ইপিনে, অসমত হৈ যোৱা লোকসভা নিৰ্বাচনত গুৱাহাটীত জয়লাভৰ বাবে তেওঁ খুবেই আশাবাদী বুলিও লগতে মন্তব্য কৰে।
