কৰ’না মহামাৰীৰ সময়ত সমগ্ৰ বিশ্বৰ জনসাধাৰণে যেন ভালদৰে বুজি উঠিছে যে চিকিৎসক হৈছে ঈশ্বৰৰ দেৱদূত।
কৰ’না সংক্ৰমণৰ আশংকাকো আওকাণ কৰি চিকিৎসক, নাৰ্চ তথা স্বাস্থ্যকৰ্মীসকলে ৰোগীৰ সেৱাত নিজকে নিয়োজিত কৰি আহিছে।
তেওঁলোকৰ চৰম ত্যাগৰ বিনিময়ত বিশ্বৰ লক্ষ লক্ষ লোক সুস্থ হৈ উঠিছে, মৃত্যুৰ মুখৰ পৰা উভতি আহিছে।
সেয়েহে, শাৰদীয় দূৰ্গা পূজাৰ প্ৰাক্ক্ষণত গণদেৱতাই চিকিৎসকসকলক ঈশ্বৰৰ স্থানত বহুৱাইছে।
ইয়াৰ মাজতেই ছচিয়েল মিডিয়াত ভাইৰেল হৈ পৰিছে এগৰাকী মহিলা চিকিৎসকৰ দশভূজা ৰূপ।
ছচিয়েল মিডিয়াত ভাইৰেল হৈ পৰা এই ছবিত এগৰাকী মহিলা চিকিৎসকে ৰোগীৰ চিকিৎসা কৰা দেখা গৈছে। মা দুৰ্গাৰ দৰেই তেওঁৱো দশভূজা।
তেওঁৰ কোনোবাখন হাতত যদি আছে ষ্টেথ’স্কোপ, আন কোনোখন হাতত আছে ইঞ্জেকশ্যন।
দৰাচলতে অল ইণ্ডিয়া মেডিকেল ষ্টুডেন্ট এছ’চিয়েশ্যনে এই ছবিখন প’ষ্ট কৰি সকলোকে নৱৰাত্ৰিৰ শুভেচ্ছা জনাইছে।
ভাইৰেল হৈ পৰা এই ছবিখনৰ ওপৰত মন্তৱ্য কৰি বহুতেই লিখিছে, ‘’এইদৰে চিকিৎসকৰ ৰূপত যাতে মা দুৰ্গাই আমাক আঁকোৱালি ধৰি ৰাখে। ভয়ংকৰ সংক্ৰমণৰ পৰা যাতে ৰোগীসকলক সুস্থ কৰি ৰাখে।‘’
পৃথিৱীৰ এনে অসুস্থ অৱস্থাত ছবিখনে যেন সকলোৰে প্ৰকৃত মনৰ কথাকে প্ৰতিফলিত কৰিছে।
Wish you a very HAPPY NAVRATRI pic.twitter.com/LYNyFKJKMf
— ALL INDIA MEDICAL STUDENTS' ASSOCIATION (@official_aimsa) October 17, 2020
নেটিজেনসকলে বিশ্বৰ সকলো চিকিৎসক, নাৰ্ছ তথা স্বাস্থ্যকৰ্মীসকলক অভিনন্দন জনাই প্ৰশংসাৰে উপচাই পেলাইছে।
কিন্তু এই ঈশ্বৰৰ হাতৰ এতিয়াও প্ৰয়োজন আছে। উৎসৱৰ বতৰত কৰ’নাৰ প্ৰত্যাহ্বান বৃদ্ধি পোৱাৰো সম্ভাৱনা অধিক। উৎসৱ-আনন্দৰ ছুটীৰ পৰা নিজকে নিলগাই ৰাখি ৰোগীৰ সেৱাত আত্মনিয়োগ কৰাৰ গুৰু দায়িত্বও এই ঈশ্বৰৰ দেৱদূতসকলৰ হাততেই ন্যস্ত ৰৈছে।
