বিশ্বনাথৰ বন সংমণ্ডল প্ৰাধিকাৰী (বন্যপ্ৰাণ সংৰক্ষণ সংমণ্ডলত ) কাৰ্যালয়ত আজি এক শোকাকূল পৰিবেশ। কাৰ্যলয়টোৰ চৌদিশে কেৱল কান্দোনৰ ৰোল। সকলোৰে হিয়া ভগা কান্দোনত মাজে মাজে মহিলা আৰক্ষীৰ টনা আজোৰা। এই পৰিৱেশৰ কাৰণ হৈছে বন বিভাগৰ লক-আপত ৰহস্যজনক ভাবে উদ্ধাৰ হৈছে চোৰাং চিকাৰী মিৰ্জাদ আলীৰ মৃতদেহ। যোৱা ২২ ডিচেম্বৰত তেজপুৰ আৰক্ষীয়ে বন্দুকসহ গ্ৰেপ্তাৰ কৰিছিল চোৰাং চিকাৰী মিৰ্জাদক।
যোৱা ৬ জানুৱাৰি দেওবাৰে বিশ্বনাথৰ বন সংমণ্ডল প্ৰাধিকাৰী কাৰ্যালয়ে ৭ দিনৰ জিম্মাত আৰক্ষীৰ পৰা দূধৰ্ষ চোৰাং চিকাৰীজনক জিম্মাত লোৱাৰ পিছতে আজি পুৱা লক-আপৰ ভিতৰতে ৰহস্যজনক ভাৱে ডিঙিত চিপ লোৱা অবস্থাত আজি পোৱা উদ্ধাৰ হৈছে চোৰাং চিকাৰীজনৰ মৃতদেহ। তাৰ পিছতেই এই কাৰ্যালয়টোত শোকাকুল পৰিবেশ বিৰাজ কৰিছে।
এই ঘটনা মিৰ্জাদৰ পৰিয়ালে গম পোৱাৰ পিছতে এক শোকাকূল পৰিবেশৰ সৃষ্টি হয় বন বিভাগৰ কাৰ্যালয়ত। পৰিয়ালৰ এটাই কথা ”আমাকো মাৰি পেলাওক, পইচা লাগে প্ৰাঞ্জল বৰুৱাক, তেজ বিক্ৰী কৰি বা কিডনি বিক্ৰী কৰি হলেও আমি টকা দিলো হয়। কিয় মাৰি পেলালে আমাৰ মানুহজনক।” হয়, বন বিভাগৰ জিন্মাত কি দৰে লক-আপৰ ভিতৰত এজন আচামীৰ মৃত্যু সংঘটিত হ’ল সেয়া চিন্তনীয় বিষয়।
বন বিভাগে এই মৃত্যুক আত্মহত্যাৰ ৰূপ দিয়াৰ চেষ্টা চলাইছে যদিও পৰিয়ালৰ মতে এয়া কোনো পধ্যেই আত্মহত্যাৰ ঘটনা নহয়। পৰিয়ালৰ মতে এয়া এক পৰিকল্পিত হত্যাকাণ্ড। পৰিয়ালৰ ষ্পষ্ট অভিযোগ যে প্ৰঞ্জল বৰুৱাই মৃত মিৰ্জাদৰ পৰা বিচাৰি্ছিল নগদ তিনি লাখ টকা আৰু এখন গাড়ী। নিৰ্দিষ্ট সময়ৰ ভিতৰত মৃত মিৰ্জাদৰ পৰিয়ালে দিব নোৱাৰিলে প্ৰাঞ্জল বৰুৱাই দাবী কৰা ধন আৰু গাড়ী। যাৰ বাবে ৰেঞ্জাৰ প্ৰাঞ্জল বৰুৱাই নিশা মিৰ্জাদক এইদৰে হত্যা কৰি আত্মহত্যাৰ ৰূপ দিয়াৰ চেষ্টা কৰাৰ অভিযোগ তুলিছে পৰিয়ালে।
ইতিমধ্যে বিশ্বনাথ আৰক্ষী উক্ত কাৰ্যলয়ত উপস্হিত হৈ পৰিস্থিতি নিয়ন্ত্ৰণ কৰি মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে। আৰক্ষীৰ অনুসন্ধানত হে ওলাব প্ৰকৃত ৰহস্য।
আনহাতে উক্ত ঘটনাটো হত্যাই হওক বা আত্মহত্যাই হওক, বন বিভাগৰ লক-আপৰ ভিতৰত আচামীৰ মৃতদেহ উদ্ধাৰ হোৱা ঘটনাই তিব্ৰ চাঞ্চল্যৰ সৃষ্টি হৈছে সমগ্ৰ বিশ্বনাথত।
