সংকটৰ সময়ত যদি আপোনাৰ কাৰোবাক সহায় কৰাৰ অদম্য হেপাহ আৰু ইচ্ছাশক্তি থাকে তেন্তে উপাৰ্জন আৰু অৰ্থ কেতিয়াও বাধা হ’ব নোৱাৰে। এই কথা প্ৰমাণ কৰিছে দৈনিক ২০০ টকা উপাৰ্জন কৰা ত্ৰিপুৰাৰ গৌতম দাস নামৰ এজন লোকে।
পেচাত এজন ৰিক্সা চালক ৫১ বছৰীয়া দাসে নিজৰ ১০ হাজাৰ টকাৰ জমাৰ পৰা ৮ হাজাৰ টকা খৰচ কৰিছে দুখীয়া লোকৰ বাবে।
দাসে লকডাউনৰ বাবে খাদ্য সংকটত ভোগা দুখীয়া পৰিয়ালক নিজৰ জমা ধনৰ পৰা চাউল-দাইল ক্ৰয় কৰি বিতৰণ কৰা কাৰ্যই দৰিদ্ৰৰ হৃদয় জিনিছে।
উল্লেখ্য যে, বৰ্তমান তেওঁ ৰাজধানী আগৰতলাৰ সমীপৱৰ্তী সাধুতিলা গাঁৱত অকলেই বাস কৰে। কিছু বছৰ পূৰ্বে দাসে হেৰুৱাইছিল নিজৰ পত্নীক। সন্তানো তেওঁৰ সৈতে নাথাকে।
প্ৰধান মন্ত্ৰী মোদীয়ে দেশজুৰি ২১ দিনীয়া লকডাউন ঘোষণা কৰাৰ পিছতেই সাধাৰণ লোকৰ দৰে দাসেও চিন্তিত হৈ পৰিছিল। এই সময়ত দুখীয়া আৰু দিন হাজিৰা কৰা পৰিয়াল সমূহ বিপদত পৰাৰ কথা চিন্তা কৰি দাসে নিজৰ সাধ্যানুসাৰে এই সকল লোকক সহায় কৰাৰ কথা চিন্তা কৰে।
‘লকডাউন ঘোষণা কৰাৰ পিছতেই মই চিন্তিত হৈ পৰিছিলো। লকডাউনৰ পূৰ্বে মোৰ দৈনিক ২০০ টকাকৈ উপাৰ্জন হৈছিল। মোৰ ক্ষুদ্ৰ উপাৰ্জনৰ পৰা ১০ হাজাৰ টকা জমা কৰিবলৈ সক্ষম হৈছিলো। লকডাউনৰ সময়ত কেনেদৰে চলিম সেয়া ভাবিছিলো, সমান্তৰালকৈ ভাবিছিলো মোৰ দৰে দুখীয়া পৰিয়াল আৰু দিন হাজিৰা কৰা লোকৰ কথা। তেতিয়া মই এই লোকসকলক মোৰ সাধ্যানুসাৰে সহায় কৰাৰ কথা চিন্তা কৰিলো’, দাসে এইদৰে কয়।
ইয়াৰ পিছতে দাসে নিজৰ জমা ধনৰ পৰা চাউল-দাইল ক্ৰয় কৰি পেকেটত ভৰাই নিজৰ ৰিক্সাৰ সহায়ত দুখীয়া লোকসকলৰ মাজত এই সমূহ খাদ্য সামগ্ৰী বিতৰণ কৰে।
দাসে জনোৱা মতে তেওঁ ১৬০টা এনে পৰিয়ালক সহায় আগবঢ়াইছে।
‘মোৰ দৰে লোকক সহায় কৰিবলৈ বৰ্তমানলৈকে মই চাউল-দাইল ক্ৰয় কৰোতে ৮ হাজাৰ টকা খৰচ হৈছে। লকডাউনৰ বাবে এই লোকসকলে খাদ্য সামগ্ৰী আহৰণ কৰাত যথেষ্ট কষ্ট হৈছে। যদি লকডাউনৰ সময়সীমা বৃদ্ধি হয় তেন্তে মই এই কাৰ্যসূচী চলাই যোৱাৰ চিন্তা-চৰ্চা কৰিছো’, দাসে এই কথা জানিবলৈ দিয়ে।
