আজি গুৱাহাটী উচ্চ ন্যায়ালয়ৰ মুখ্য ন্যায়াধীশ ৰূপে শপত গ্ৰহণ কৰে এ এছ বোপান্নাই। ৰাতিপুৱা ৯.৩০ বজাত ৰাজভৱনৰ দৰবাৰ হলত এক গাম্ভীৰ্যপূৰ্ণ অনুষ্ঠানৰ মাজেৰে আয়োজন কৰা শপত গ্ৰহণ অনুষ্ঠানটোত কৰ্ণাটক উচ্চ ন্যায়ালয়ৰ ন্যায়াধীশৰূপে কাৰ্যনিৰ্বাহ কৰি থকা এ এছ বোপান্নাই শপত লয়।
এ এছ বোপান্নাক ৰাজ্যপাল জগদীশ মুখীয়ে শপত বাক্য পাঠ কৰোৱায়।
উল্লেখযোগ্য যে ১৯৫৯ চনৰ ২০ মাৰ্চত জন্মগ্ৰহণ কৰা ন্যায়াধীশ বোপান্নাই ১৯৮৪ চনৰ পৰাই অধিবক্তাৰূপে কৰ্ম জীৱনৰ পাতনি মেলিছিল।
২০০৬ চনৰ ৬ জানুৱাৰিত এ এছ বোপান্নাই কৰ্ণাটক উচ্চ ন্যায়ালয়ৰ অতিৰিক্ত ন্যায়াধীশ ৰূপে নিযুক্তি লাভ কৰিছিল আৰু ২০০৭ চনৰ ১ মাৰ্চৰ পৰা কৰ্ণাটক উচ্চ ন্যায়ালয়ৰে স্থায়ী ন্যায়াধীশ ৰূপে নিযুক্তি লাভ কৰে।
অতি উল্লেখণীয় বিষয় যে কৰ্ণাটক উচ্চ ন্যায়ালয়ৰ ন্যায়াধীশ হিচাপে ১২ বছৰ ৯ মাহ কাৰ্যকালত বোপান্নাই মাত্ৰ চাৰিদিন হে ছুটী লোৱা বুলি জানিব পৰা গৈছে। ইয়াৰ পৰাই প্ৰমাণ হয় যে এছ বোপান্নাই কিমান নিষ্ঠা তথা গুৰুত্বসহকাৰে নিজৰ দায়িত্ব পালন কৰি আহিছে।
