তেজপুৰৰ মিলনপুৰত এখন চুখয়-৩০ বিমান দুৰ্ঘটনাগ্ৰস্ত হৈছে। আজি নিশা প্ৰায় ৮:৩০ বজাত সংঘটিত হৈছে এই দুৰ্ঘটনা।
মিলনপুৰৰ ৰাস্তাৰ কাষৰ এখন পথৰাত ভূ-পতিত হয় চুখয়-৩০ বিমানখন। দুৰ্ঘটনাটোৰ ফলত সম্পূৰ্ণৰূপে জ্বলি চাৰ-খাৰ হয় বিমানখন।
বিমানখনৰ ধ্বংসাৱশেষ মিলনপুৰৰ উক্ত পথাৰখনত এতিয়াও পৰি ৰৈছে।
বিমানখনত দুজন পাইলট আছিল। বিমানখন পথাৰত ভূ-পতিত হোৱাৰ ফলত পথাৰৰ ধানৰ খেতি সম্পূৰ্ণৰূপে নষ্ট হোৱা বুলি জানিব পৰা গৈছে।
বিমানখনৰ পৰা দুয়োজন পাইলটে ‘ইজেক্ট’ কৰিবলৈ সক্ষম হৈছে। ইয়াৰে এজন পাইলটৰ অৱস্থা সংকটজনক বুলি জানিব পৰা গৈছে।
পাইলটগৰাকীয়ে ভৰিত বৰ বেয়াকৈ আঘাত পোৱা বুলি জানিব পৰা গৈছে।
আনগৰাকী পাইলটেও ভৰিত সামান্য পৰিমাণে আঘাত পোৱা বুলি এক সূত্ৰই জানিব দিছে।
ঘটনাস্থলীত চাৰিখনকৈ অগ্নি নিৰ্বাপক বাহিনীৰ বাহন উপস্থিত হৈ আধাঘন্টা জোৰা প্ৰচেষ্টাৰ অন্তত জুই নিৰ্বাপন কৰিবলৈ সক্ষম হয়।
ইতিমধ্যে ঘটনাস্থলীত বায়ুসেনাৰ উচ্চপদস্থ বিষয়া গৈ উপস্থিত হৈছে। অৱশ্যে আহত পাইলট দুগৰাকীৰ পৰিচয় বৰ্তমানলৈকে উদ্ধাৰ হোৱা নাই।
