কলম-কেমেৰা এৰি সাংবাদিকৰ হাতত দা-কটাৰী। মাৰ্ঘেৰিটাৰ ৰাজপথত আজি এই দৃশ্য পৰিলক্ষিত হয়। কিন্তু কিয় সাংবাদিকৰ এই ৰূপ?
ৰাজ্যখনৰ অন্যতম গুৰুত্বপূৰ্ণ নগৰ মাৰ্ঘেৰিটা। কাষতে অৰুণাচল প্ৰদেশৰ চাংলাং-টিৰাপ জিলা। আন্তঃৰাজ্যিক গুৰুত্ব থকা জাগুন-লিডু হৈ ৩১৫ নং ৰাষ্ট্ৰীয় ঘাই পথেদি মাৰ্ঘেৰিটা নগৰলৈ সোমোৱাৰ বা তিনিচুকীয়াৰ পৰা মাৰ্ঘেৰিটা নগৰৰ সীমাত নিউ কলনি নামে ঠাইখন।
চেইন্ট মেৰিছ স্কুল পাৰ হৈয়ে সৎসঙ্গ বিহাৰ নামৰ ধৰ্মীয় অনুষ্ঠানটো পায়। এই অনুষ্ঠানৰ চৌহদৰ পকীবেৰ মাহেকে-পষেকে নিয়মিত ভাঙে। ইয়াৰ কাৰণ বছৰ বছৰ ধৰি হৈ অহা দুৰ্ঘটনা।
অজস্ৰজনে উক্ত স্থানত দুৰ্ঘটনাত পতিত হৈছে। কিন্তু অতি পৰিতাপৰ কথা উক্ত পথছোৱা বা টাৰ্ণিংটো মৰণফাণ্ড হিচাপে বছৰ বছৰ ধৰি পৰিণত হৈ আহিছে যদিও চৰকাৰ-প্ৰশাসনৰ কাণসাৰ নাই।
Also Read: বিদ্যুত মাচুল আদায়ত কঠোৰ হ’বলৈ ধুবুৰীত এ পি ডি চি এলৰ বিষয়াক নিৰ্দেশ মুখ্য সচিব জিষ্ণু বৰুৱাৰ
আজি মাৰ্ঘেৰিটা সাংবাদিক সংস্থাৰ উদ্যোগত তথা সৎসঙ্গ বিহাৰ কমিটিৰ সহযোগত গ্ৰহণ কৰা হয় এক ছাফাই অভিযান তথা সতৰ্কতামূলক কাৰ্যসূচী।
সংস্থাৰ সভাপতি ৰামপ্ৰসাদ আম্বেদকাৰ, সাধাৰণ সম্পাদক প্ৰশান্ত চেতিয়া, উপ সভাপতি সমীৰণ বৰঠাকুৰ, যুটীয়া সম্পাদক তপন দে, কোষাধ্যক্ষ ফাইজুৰ ৰহমান, মুখপাত্ৰ মানস প্ৰতিম গগৈ, সাংগঠনিক সম্পাদক মিঠুন বৰুৱা আদিৰ নেতৃত্বত পুৱা ৮ বজাৰ পৰা চলোৱা হয় ছাফাই অভিযান।
পথটোৰ দুয়োকাষে থকা হাবি জংঘল কাটি চাফ -চিকুণ কৰা হয়। লগতে গাড়ী লাহে লাহে চলাবলৈ আহ্বান জনায় বেনাৰ পোষ্টাৰ লগোৱা হয়। উক্ত স্থানত থকা পকী ব্ৰীজখন ৰং কৰাও হয়।
এই কাৰ্যসূচীত অংশগ্ৰহণ কৰি তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগে মাৰ্ঘেৰিটা সাংবাদিক সংস্থাৰ পদক্ষেপৰ শলাগ লয়। তেওঁ চৰকাৰ প্ৰশাসনক অতিশীঘ্ৰে এই স্থানত সতৰ্কতামূলক ব্যৱস্থা হাতত ল’বলৈ আহ্বান জনায়।
উল্লেখ্য যে এই সম্পৰ্কে মাৰ্ঘেৰিটা মহকুমাধিপতিক মাৰ্ঘেৰিটা সাংবাদিক সংস্থা আৰু সৎসঙ্গ বিহাৰ কমিটিয়ে সবিশেষ জনাই পৃথকে পৃথকে স্মাৰকপত্ৰ দাখিল কৰিছিল। কিন্তু এপষেকৰ পাছতো কোনো ব্যৱস্থা নহ’ল।
Also Read: India’s Sex Ratio প্ৰথমবাৰৰ বাবে ভাৰতত পুৰুষতকৈ অধিক হ’ল মহিলাৰ সংখ্যা: সমীক্ষা
অৱশ্যে মাৰ্ঘেৰিটা সাংবাদিক সংস্থাৰ এটি প্ৰতিনিধি দলে স্থানীয় বিধায়ক ভাস্কৰ শৰ্মাক সাক্ষাৎ কৰি এই বিষয়ে অৱগত কৰাত ইতিমধ্যে তেওঁ দুয়োকাষে লাইট লগোৱাৰ নিদেৰ্শ দিছে।
