উত্তৰ প্ৰদেশৰ হাথৰাছৰ তৰুণীৰ গণ ধৰ্ষণে দেশ কঁপাই তোলাৰ সময়তে সমগ্ৰ দেশতে যোগী আদিত্যনাথৰ বিজেপি চৰকাৰে নাৰী সুৰক্ষা প্ৰদানত ব্যৰ্থ বুলি সমালোচিত হৈছিল।
সমগ্ৰ দেশতে ধৰ্ষণৰ বিৰুদ্ধে উঠা গণ জোৱাৰে দেশত ধৰ্ষণজনিত অপৰাধৰ পৰিমাণ হ্ৰাস কৰিব বুলি ধাৰণা কৰা হৈছিল যদিও সেই ধাৰণা ভুল বুলি বাৰে বাৰে প্ৰমাণিত কৰিছে সঘনাই সংঘটিত হৈ থকা ইটোৰ পিছত সিটো ধৰ্ষণ কাণ্ডই।
বিকৃত আৰু অপৰাধী মানসিকাতাৰ লোকে এই ধৰ্ষণ কাণ্ডবোৰ সংঘটিত কৰি আহিছে মানুহে এক ধাৰণা কৰাৰ সময়তে এইবাৰ খোদ আৰক্ষীয়েই থানাত আৱদ্ধ কৰি ৰাখি এগৰাকী মহিলাক ১০ দিন ধৰি গণধৰ্ষণ কৰি অহাৰ এক গুৰুতৰ অভিযোগ উত্থাপন হৈছে। অৱশ্যে গাপ দি ৰখা এই ঘটনাটো সংঘটিত হৈছিল বিগত মে’ মাহত।
সূত্ৰৰ খবৰ মতে যোৱা ১০ অক্টোবৰ দিনাই এই ঘটনাটো পোহৰলৈ আহিছিল। ঘটনাটো সংঘটিত হৈছে বিজেপিৰ শিৱৰাজ সিং চৌহানৰ শাসনাধিষ্ঠ মধ্য প্ৰদেশত।
ঘটনাৰ বিৱৰণীৰ মতে মধ্য প্ৰদেশৰ ৰেওৱা জিলাৰ মাঙ্গাউন থানাত হত্যাৰ অভিযোগত এগৰাকী মহিলাক বন্দী কৰি ৰাখি উপৰ্যুপৰি ১০ দিন ধৰি ৫ আৰক্ষীয়ে গণধৰ্ষণ কৰে।
মহিলা গৰাকীয়ে দাবী কৰিছে যে তেওঁ নিজেও পূৰ্বতে এগৰাকী আৰক্ষী কনিষ্টবল আছিল। এক ভুৱা গোচৰত তেওঁক আটক কৰি থানাত আৱদ্ধ কৰি যোৱা ৯ মে’ৰ পৰা ২১ মে’লৈ ৫ জন আৰক্ষীৰ লোকে উপৰ্যুপৰি ধৰ্ষণ কৰিছিল।
পিছে এই সমগ্ৰ ঘটনাটো গোপনে ৰখা হয় বুলিও মহিলা গৰাকীয়ে দাবী কৰিছে।
বৰ্তমানেও জেইলত কাৰাৰুদ্ধ হৈ থকা মহিলা গৰাকীয়ে ৰেওৱা জিলাৰ অতিৰিক্ত জিলা আদালতৰ বিচাৰপতিয়ে কাৰাগাৰত সাক্ষাৎ কৰোতে এই সমস্ত ঘটনাটো অৱগত কৰে। মহিলা গৰাকীয়ে বিচাৰপতিক লগতে এইটোও জনায় যে কাৰাগাৰৰ ৱাৰ্ডেনকো এই ঘটনাৰ বিষয়ে জনোৱা হৈছিল। কিন্তু তেওঁ কোনো ব্যৱস্থা গ্ৰহণ নকৰিলে।
বিচাৰপতিয়ে এই অভিযোগ পোৱাৰ পিছতে ঘটনাটোৰ তদন্তৰ বাবে নিৰ্দেশ দিছে। ইফালে তদন্তত বহু চাঞ্চল্যকৰ তথ্য লাভ কৰা বুলি জানিব পৰা গৈছে।
ইফালে কাৰাগাৰৰ ৱাৰ্ডেনে মহিলা গৰাকীয়ে তেওঁক ধৰ্ষণৰ বিষয়ে অৱগত কৰা বুলি স্বীকাৰ কৰিছে। আনহাতে মহিলা গৰাকীয়ে ভুৱা অভিযোগ উত্থাপন কৰা বুলি আৰক্ষীয়ে দাবী কৰি ২১ মে’ত মহিলা গৰাকীক গ্ৰেপ্তাৰ কৰা বুলি জনাইছে।
ঘটনাটোৱে শিৱৰাজ সিং চৌহানৰ বিজেপিৰ চৰকাৰখনক যথেষ্ট অস্বস্তিত পেলোৱা পৰিলক্ষিত হৈছে।
উল্লেখ্য যে ৰাজ্যখনত কিছু মাহৰ পাছতে ২৮ খন বিধানসভা আসনৰ বাবে নিৰ্বাচন হোৱাৰ কথা। এই নিৰ্বাচনৰ ফলাফলৰ ওপৰতে চৌহানৰ চৰকাৰৰ ভৱিষ্যৎ নিৰ্ভৰ কৰিব বুলিও ৰাজনৈতিক বিশ্লেষকসকলে মন্তব্য কৰিছে।