কলিয়াবৰৰ এগৰাকী মহিলাৰ কাহিনী এয়া। নাম তেওঁৰ টুলু দেৱী। বয়স ৬০-ৰ ঊৰ্ধ্বত। যোৱা দুমাহ ধৰি জখলাবন্ধা চিকিৎসালয়ৰ বাৰান্দাই হৈ পৰিছে তেওঁৰ ঠিকনা।
টুলু দেৱীৰ পৈতৃক ঘৰ কলিয়াবৰৰ হাতীয়েখোৱা গাৱঁত আৰু বিবাহ সূত্ৰে তেওঁৰ স্বামীৰ ঘৰ শোণিতপুৰ জামগুৰিহাটৰ ইটাখোলাৰ চিলাবন্ধা গাৱঁত। কিন্তু স্বামী সুৰেন নাথৰ শাৰীৰিক, মানসিক, অত্যাচাৰত অতিষ্ঠ হৈ স্বামীৰ ঘৰ এৰি আহি পিতৃগৃহত আশ্ৰয় লৈছিল তিনিটা সন্তানৰ মাতৃ টুলু দেৱীয়ে।
নিজৰ ভায়েকৰ ওপৰত আৰু বেছি বোজা হ’ব নিবিচাৰি টুলু দেৱীয়া আশ্ৰয় দুমাহৰ পূৰ্বে আশ্ৰয় লয় কলিয়াবৰৰ জখলাবন্ধা চিকিৎসালয়ত। ইয়াৰ পিছৰ পৰা বিগত দুমাহ দিন ধৰি চিকিৎসালয়খনতে আশ্ৰয় গ্ৰহণ কৰি আছে তেওঁ। চিকিৎসালয়খনৰ বাৰান্দাখনেই এতিয়া তেওঁৰ ঠিকনা।
ইফালে তিনিটাকৈ পুত্ৰ সন্তানে মাক টুলু দেৱীক নিজৰ ঘৰলৈ উভতাই নিবলৈ বহু বাৰ চেষ্টা কৰিও বিফল হৈছিল। কিয়নো গিৰীয়েকৰ অত্যাচাৰত ইতিপূৰ্বে অতিষ্ঠ হৈ পৰিছিল টুলু দেৱী। সেই বাবেই তেওঁ পুনৰ স্বামীৰ ঘৰলৈ ঘূৰি যাবলৈ অসন্মত হয়।
প্ৰথম অৱস্থাত জখলাবন্ধা চিকিৎসালয়ৰ কৰ্তৃপক্ষই প্ৰথমে টুলু দেৱীক ৰোগী বুলি ভাবি আশ্রয়ৰ লগতে খাদ্যও যোগান ধৰিছিল। কিন্তু কিছু দিন যোৱাৰ পাছত টুলু দেৱীৰ কোনো আত্মীয় চিকিৎসালয়ত উপস্থিত নোহোৱাত কথাটো চকুত পৰে চিকিৎসালয় কৰ্তৃপক্ষৰ।
এতিয়া পৰিস্থিতিটোৰ বাবে বিমোৰত পৰিছে জখলাবন্ধা চিকিৎসালয়ৰ চিকিৎসক তথা কৰ্তৃপক্ষ। কিমান দিনলৈ আৰু অন্য ৰোগীৰ লগতে তেওঁকো খাদ্যৰে যোগান ধৰিব। গতিকে ক্ৰমাৎ কমি গৈছে চিকিৎসালয়খনে আহাৰ যোগান ধৰাটো। তাৰ পিছতো অসহায় টুলু দেৱীয়ে এতিয়া এসাঁজ খাই দুসাঁজ নোখোৱাকৈ চিকিৎসালয়খনৰ বাৰান্দাতে দিন-ৰাতি একাকাৰ কৰিছে।
কেতিয়াবা যদি চিকিৎসালয়ৰ ৰোগীৰ আত্মীয়ৰ লগত হাঁহি-ধেমালিৰ মাজেৰে দিনটো পাৰ কৰে, কেতিয়াবা আকৌ দুচকু সেমেকি উঠে তেওঁৰ। পৰিয়ালৰ লগতে সন্তানকেইটালৈ মনত পৰি চকুলো টোকে টুলু দেৱীয়ে। কিন্তু এতিয়াও টুলু দেৱীৰ কোনো পৰিয়ালৰ লোক বা অভিভাৱক জখলাবন্ধা চিকিৎসালয় উপস্থিত হোৱা নাই। সেয়ে এতিয়া এই মহিলাগৰাকীক লৈ চিকিৎসালয় কৰ্তৃপক্ষ বিমোৰত পৰিছে। প্ৰশাসনৰ ফালৰ পৰাও একো সহায় লাভ কৰা চিকিৎসালয়খনে।
স্থানীয় ৰাইজ তথা অন্যৰোগীৰ আত্মীয়সকলেও এতিয়া প্ৰশ্ন উত্থাপন কৰিছে। কি অৱস্থা হ’ব অনাগত দিনত এই দুৰ্ভগীয়া মহিলাগৰাকীৰ?
কোনোবা আত্মীয়-স্বজন আগ বাঢ়ি আহিবনে তেওঁক উদ্ধাৰৰ বাবে অথবা চৰকাৰ তথা কোনোবা দল-সংগঠনে সহায়ৰ হাত আগ বঢ়াবনে এই দুৰ্ভগীয়া টুলু দেৱীৰ।
নিৰ্যাতনকাৰী স্বামীৰ বিৰুদ্ধে প্ৰশাসনে কি ব্যৱস্থা লয় সেয়াও লক্ষণীয় হ’ব।
