এগৰাকী ব্ৰাজিলীয় মহিলাক দক্ষিণ কোৰিয়াৰ এখন আদালতে স্থগিত কাৰাদণ্ড প্ৰদান কৰিছে। আদালতে তেওঁক দেশান্তৰিত কৰাৰো সম্ভাৱনা আছে বুলি খবৰ প্ৰকাশ পাইছে।
এই মহিলাগৰাকীৰ বিৰুদ্ধে অভিযোগ উঠিছে যে তেওঁ বিখ্যাত বিটিএছ তাৰকা জংকুকৰ ঘৰলৈ গৈ বাৰে বাৰে অস্বাভাৱিক আচৰণ কৰিছিল। আনকি তেওঁ একেৰাহে ১৩৩ বাৰ কলিংবেল বজোৱাৰ দৰে কাণ্ডও সংঘটিত কৰিছিল।
অভিযুক্ত মহিলাগৰাকীৰ নাম এতিয়ালৈকে প্ৰকাশ কৰা হোৱা নাই। যোৱা ডিচেম্বৰ মাহৰ পৰাই তেওঁ জংকুকক এইদৰে আমনি কৰিবলৈ আৰম্ভ কৰিছিল। আদালত আৰু আৰক্ষীৰ তথ্য অনুসৰি, তেওঁ জংকুকৰ ঘৰৰ সন্মুখত চিঠি আৰু ফটো থৈ অহাৰ চেষ্টা কৰিছিল। মহিলাগৰাকীয়ে দাবী কৰিছিল যে তেওঁ কেৱল ভালপোৱাৰ বাবেই এই সকলোবোৰ কৰিছিল। দক্ষিণ কোৰিয়াৰ ছিউলৰ এখন জিলা আদালতে তেওঁক এবছৰৰ কাৰাদণ্ড দিছিল যদিও সেয়া দুবছৰৰ বাবে স্থগিত ৰখা হৈছে। যদি তেওঁ এই ৰায়ৰ বিৰুদ্ধে আপীল কৰি সফল নহয়, তেন্তে তেওঁক দেশৰ পৰা উলিয়াই পঠোৱা হ’ব পাৰে।
গোচৰৰ নথিপত্ৰ অনুসৰি, যোৱা ৭ ডিচেম্বৰত মহিলাগৰাকীয়ে প্ৰথমবাৰৰ বাবে ছিউলত থকা জংকুকৰ ঘৰলৈ গৈছিল। তাত তেওঁ ঘৰৰ চাৰিওফালে বিনা কাৰণত ঘূৰি ফুৰিছিল, দেৱাল পাৰ হৈ ভিতৰলৈ বস্তু দলিয়াইছিল আৰু দৰজাৰ ফাঁকেৰে চিঠি সুমুৱাই দিছিল। ইয়াৰ মাত্ৰ কেইদিনমানৰ পাছতে তেওঁ পুনৰ তালৈ গৈ একেৰাহে ১৩৩ বাৰ কলিংবেল বজায়। আদালতে তেওঁৰ এই আচৰণক চৰম পৰ্যায়ৰ পাগলামি বুলি অভিহিত কৰিছে। ১৩ ডিচেম্বৰত তেওঁক গ্ৰেপ্তাৰ কৰা হয়। সেইদিনা তেওঁ এজন খাদ্য যোগান ধৰা কৰ্মচাৰীৰ পিছে পিছে কাষৰ গেটেৰে জংকুকৰ ঘৰত সোমাবলৈ চেষ্টা কৰিছিল। পিছদিনা তেওঁক পুনৰ সেই ঘৰৰ ওচৰলৈ নোযোৱাৰ চৰ্তত এৰি দিয়া হৈছিল, কিন্তু তেওঁ সেই সকীয়নি আওকাণ কৰে।
ইয়াৰ পৰৱৰ্তী কেইবা সপ্তাহ ধৰি তেওঁৰ এই অহা-যোৱা চলিয়েই আছিল। শেষত আৰক্ষীয়ে এক জৰুৰী নিৰ্দেশ জাৰি কৰি জংকুকৰ ঘৰৰ ১০০ মিটাৰৰ ভিতৰত তেওঁৰ প্ৰৱেশ নিষিদ্ধ কৰে। ইমানৰ পাছতো তেওঁ ৰৈ যোৱা নাছিল। ফেব্ৰুৱাৰী মাহতো জংকুকৰ ঘৰলৈ যোৱা অব্যাহত ৰখাত আৰক্ষীয়ে অৱশেষত বিষয়টো অধিবক্তাসকলৰ হাতলৈ প্ৰেৰণ কৰে। আদালতত জনোৱা হয় যে তেওঁ সকলো মিলি কমেও ২২ বাৰ তাত গৈছিল। ৰায়দানৰ সময়ত বিচাৰকে কয় যে তেওঁ পুনৰ অপৰাধ কৰাৰ আশংকা বৰ বেছি নাই, যাৰ বাবে তেওঁক এই শাস্তি প্ৰদান কৰা হৈছে। ইয়াৰ পূৰ্বে যোৱা বছৰৰ জুন মাহত জংকুকৰ সামৰিক সেৱা শেষ হোৱাৰ কেইঘণ্টামানৰ পাছতেই ছিউলত তেওঁৰ ঘৰত সোমাবলৈ চেষ্টা কৰাৰ সময়ত এগৰাকী ৩০ বছৰীয়া চীনা মহিলাকো গ্ৰেপ্তাৰ কৰা হৈছিল।
