আন্না বিশ্ববিদ্যালয়ৰ ধৰ্ষণ গোচৰত দোষী সাব্যস্ত হোৱা জ্ঞানশেখৰণক চেন্নাইৰ মহিলা আদালতে ৩০ বছৰৰ কাৰাদণ্ড বিহিছে। সোমবাৰে মহিলা আদালতৰ ন্যায়াধীশ এম ৰাজালক্ষ্মীয়ে এই শাস্তি ঘোষণা কৰে। মন কৰিবলগীয়া যে চাৰিদিন পূৰ্বে জ্ঞানশেখৰণক ধৰ্ষণকে ধৰি ১১টা অপৰাধত দোষী সাব্যস্ত কৰা হৈছিল। আজি তেওঁক নূন্যতম ৩০ বছৰৰ কাৰাদণ্ডৰ শাস্তি প্ৰদান কৰা হয়। কাৰাদণ্ডৰ উপৰিও বিশেষ আদালতে জ্ঞানশেখৰণক ৯০ হাজাৰ টকা জৰিমনা বিহে।
প্ৰসংগক্ৰমে, তামিলনাডুৰ বিৰোধী দলসমূহে ইয়াৰ পূৰ্বে অভিযোগ কৰিছিল যে তেওঁৰ শাসকীয় ডি এম কে বিশেষকৈ উপ-মুখ্যমন্ত্ৰী উদয়নিধি ষ্টেলিনৰ সৈতে ঘনিষ্ঠ সম্পৰ্ক আছে। ২৪ ডিচেম্বৰত ভুক্তভোগী মহিলাগৰাকীয়ে কোট্টাপুৰম মহিলা আৰক্ষী থানাত এজাহাৰ দাখিল কৰে। এজাহাৰত ছানীয়ে কয় যে জ্ঞানশেখৰণে তেওঁক হত্যা কৰাৰ ভাবুকি দিছিল। যুৱতীগৰাকীয়ে সন্ধিয়া পুৰুষ বন্ধুৰ সৈতে বিশ্ববিদ্যালয় চৌহদত ঘূৰি ফুৰিছিল। সেই সময়ত জ্ঞানশেখৰণে ভাবুকি দি ধৰ্ষণ কৰা বুলি অভিযোগ উত্থাপন কৰে ছানীয়ে।
অৱশেষত বিচাৰ প্ৰক্ৰিয়াত প্ৰমাণ থ’ল যে জ্ঞানশেখৰণে কেৱল ধৰ্ষণ আৰু ভাবুকি দিয়াই নহয়, ঘটনাটো তেওঁৰ মোবাইল ফোনতো ৰেকৰ্ডিং কৰে। ২৬ ডিচেম্বৰত ভুক্তভোগীৰ পৰিচয় প্ৰকাশ পোৱাৰ পিছতে মাদ্ৰাজ উচ্চ ন্যায়ালয়ে গোচৰটোৰ তদন্তৰ বাবে সৰ্বমহিলা বিশেষ অনুসন্ধান দল (SIT) গঠন কৰে।২৪ ফেব্ৰুৱাৰীত এছ আই টিয়ে তদন্ত সম্পূৰ্ণ কৰি আদালতত ১০০ পৃষ্ঠাৰ চাৰ্জশ্বীট দাখিল কৰে। যোৱা ৭ মাৰ্চত এই গোচৰটো মহিলা আদালতলৈ হস্তান্তৰ কৰা হয়। তাতেই জ্ঞানশেখৰণৰ বিৰুদ্ধে অপৰাধমূলক উদ্দেশ্য, অবৈধ প্ৰৱেশ, অশ্লীল আক্ৰমণ, মহিলাক অপহৰণ, ধৰ্ষণ, তথ্য প্ৰযুক্তি আইন আৰু তামিলনাডু মহিলাৰ ওপৰত অত্যাচাৰ প্ৰতিৰোধ আইন আদিৰ অপৰাধাত শাস্তি বিহা হয়।
