বাংলাদেশ, আফগানিস্তান আৰু পাকিস্তানত ধৰ্মভিত্তিক নিৰ্যাতনৰ বলি হোৱা বুলি ছটা ধৰ্মীয় সম্প্ৰদায়ক ভাৰতৰ নাগৰিকত্ব প্ৰদান কৰাৰ বাবে ২০১৫ চনত কেন্দ্ৰীয় চৰকাৰে জাৰি কৰা দুখন অধিসূচনাৰ সাংবিধানিক বৈধতাক প্ৰত্যাহ্বান জনাই উচ্চতম ন্যায়ালয়ত দাখিল কৰা হৈছে আৰু এখন আবেদন।
মুখ্য ন্যায়াধীশ ৰঞ্জন গগৈ আৰু ন্যায়াধীশ সঞ্জীৱ খান্নাৰ বিচাৰপীঠে শুকুৰবাৰে পাৰপত্ৰ সংশোধনী বিধি, ২০১৫ আৰু বিদেশী (সংশোধনী) নিৰ্দেশ ২০১৫ক প্ৰত্যাহ্বান জনাই দাখিল কৰা জনস্বাৰ্থ জড়িত আবেদনখন সন্দৰ্ভত কেন্দ্ৰ, কেন্দ্ৰীয় গৃহ আৰু বৈদেশিক পৰিক্ৰমা মন্ত্ৰণালয় আৰু ত্ৰিপুৰা চৰকাৰলৈ এখন জাননী প্ৰেৰণ কৰিছে।
আবেদনকাৰী ত্ৰিপুৰা পীপলছ ফ্ৰণ্টৰ পাতাল কন্যা জামাতিয়াই অভিযোগ কৰা অনুসৰি বাংলাদেশৰপৰা হোৱা অবৈধ প্ৰব্ৰজনে ত্ৰিপুৰাৰ জনগাঁথনি সলনি কৰি পেলাইছে আৰু সংখ্যাগুৰু থলুৱাসকল এতিয়া সংখ্যালঘু সম্প্ৰদায়ত পৰিণত হৈছে। উচ্চতম ন্যায়ালয়ক গৃহ মন্ত্ৰণালয়ৰ উক্ত সংশোধনীক অবৈধ ঘোষণা কৰিবলৈ অনুৰোধ জনাইছে আৱেদনকাৰী পাতাল কন্যা জামাতিয়াই।
শেহতীয়াভাৱে উক্ত সংশোধনীক প্ৰত্যাহ্বান জনাই আন এখন লেখ আবেদন দাখিল কৰা হৈছিল। নাগৰিকত্ব সংশোধনী বিধেয়ক বিৰোধী মঞ্চৰ হৈ অসমৰ বিশিষ্ট বুদ্ধিজীৱী ড০ হীৰেন গোহাঁই, প্ৰাক্তন আৰক্ষী সঞ্চালক প্ৰধান ড০ হৰেকৃষ্ণ ডেকা আৰু জেষ্ঠ সাংবাদিক মনজিৎ মহন্তই এই লেখ আবেদন দাখিল কৰিছে।