অদম্য কৰ্মস্পৃহা থাকিলে যিকোনো কামকেই সম্ভৱ কৰি তুলিব পাৰি। তাঁতশালত এক অতুলনীয় কৰ্মৰ জৰিয়তে এই কথা প্ৰমাণ কৰিলে তামুলপুৰৰ এগৰাকী যুৱকে। এতিয়া সামাজিক মাধ্যমত বহুলভাৱে চৰ্চিত হৈ পৰিছে যুৱকজনৰ শিল্পকৰ্ম।
যুৱকজনৰ হাতৰ পৰশত অসম তথা অসমীয়াৰ স্বাভিমান ফুলাম গামোচাত প্ৰাণ পাই উঠিছে অসমৰ কেইবাগৰাকীও বৰেণ্য ব্যক্তিৰ প্ৰতিচ্ছবি। গামোচাতে বই উলিয়াইছে অসমৰ জাতীয় সংগীতৰ প্ৰতিটো আখৰ।
তামুলপুৰ জিলা সদৰৰ বৰখোপা গাঁওৰ এই বিশেষ দক্ষ যুৱকজন হৈছে ২০ বছৰীয়া বিজয় দাস। পিতৃ শুক্ৰ দাস শৰণীয়া আৰু মাতৃ জোনালী দাসৰ পুত্ৰ বিজয় দাস বৰ্তমান ৰঙিয়া মহাবিদ্যালয়ৰ চতুৰ্থ সান্মাষিকৰ ছাত্ৰ।
সৰুৰে পৰা তাঁতশালত কাপোৰ বোৱাৰ প্ৰতি ধাউতি আছিল বিজয় দাসৰ। ঘৰতে তাঁতশালত বহি অসম তথা অসমীয়াৰ স্বাভিমান গামোচাত তুলি ধৰিছে অসমৰ কেইবাগৰাকীও বৰেণ্য ব্যক্তিৰ প্ৰতিচ্ছবি ।
অধ্যয়নৰ সমান্তৰালভাৱে তাঁতশালত বহি বিজয় দাসে সুতাৰে তুলিছে সাহিত্যৰথী ৰসৰাজ লক্ষ্মীনাথ বেজবৰুৱা, বিষ্ণু প্ৰসাদ ৰাভা, জ্যোতিপ্ৰসাদ আগৰৱালা, ডঃ ভূপেন হাজৰিকা, দীপালী বৰঠাকুৰ, মামণি ৰয়ছম গোস্বামী, হীৰেন ভট্টাচাৰ্য, জুবিন গাৰ্গ, অংগৰাগ পাপন মহন্তৰ লগতে অসমৰ কীৰ্তিচিহ্ন ৰংঘৰ, কাৰেংঘৰ, কামাখ্যা মন্দিৰ।
দিনে নিশাই কৰা কষ্টৰ অন্তত বিজয়ে এইদৰে গামোচাত সুন্দৰকৈ উপস্থাপন কৰি তুলিছে অসমৰ মান-স্বাভিমানৰ কীৰ্তি চিহ্ন সমূহ। যুৱকজনে তাঁতশালত বহাৰ বাহিৰেও ছবি অংকন কৰি, গান গাই, বিহু নাচি ভাল পায়।
অতি দৰিদ্ৰ পৰিয়ালৰ সন্তান বিজয় দাসে তাঁতশালত গামোছা বই গামোছা বিক্ৰী কৰি নিজৰ পঢ়া খৰছ উলিয়ায়। আনহাতে, তিনি বছৰ পূৰ্বে বিজয় দাসে তাঁতশালত অসমৰ জাতীয় সংগীত বই উলিয়াইছিল। বিজয় দাসে প্ৰস্তুত কৰা এই গামোচা মিউজিয়ামত ৰখাৰ কথা ব্যক্ত কৰিছে স্থানীয় ৰাইজে।
মাতৃয়ে তাঁতশালত বহা দেখি সৰুৰে পৰা নিজেও তাত শালত বহাৰ প্ৰতি আগ্ৰহী হৈ উঠিছিল এইজন যুৱকে।
অসমীয়া জাতি, অসমৰ কৃষ্টি সংস্কৃতিৰ প্ৰতি থকা অদম্য শ্ৰদ্ধা আৰু ভালপোৱাৰ বাবেই এনেদৰে গামোচাত স্বনামধন্য লোক আৰু অসমৰ কীৰ্তি চিহ্ন সমূহ উপস্থাপন কৰাৰ কথা ব্যক্ত কৰে বিজয় দাসে।
