আজি চলি আছে বিতৰ্কিত আৰু চৰ্চিত গুজৰাট বিধান সভা নিৰ্বাচনৰ ভোট গণনা। ৰাজনৈতিক মহলৰ আশংকা মতেই গুজৰাটৰ ভোট গণনাই দিছে ভাৰতীয় জনতা পাৰ্টিৰ বিজয়ৰ সম্ভেদ।
গুজৰাট বিধান সভাৰ মুঠ ১৮২ খন আসনৰ অধিকাংশ আসনতেই আগবাঢ়ি আছে ভাৰতীয় জনতা পাৰ্টি। ভাৰতীয় জনতা পাৰ্টি পুনৰ শাসনলৈ আহিব নেকি বিজেপিৰ দুই মহাৰথী প্ৰধান মন্ত্ৰী নৰেন্দ্ৰ মোডী আৰু গৃ্হমন্ত্ৰী অমিত শ্বাহৰ গৃ্হৰাজ্য গুজৰাটত? ইতিমধ্যে পৰিস্ফূট হৈ পৰিছে এই প্ৰশ্নৰ উত্তৰ।
১ বজালৈকে হোৱা গণনা অনুসৰি গুজৰাটত ১৫৪ খন আসনত আগুৱাই আছে ভাৰতীয় জনতা পাৰ্টি।
কংগ্ৰেছে এতিয়ালৈ আগুৱাই আছে ১৯ খন আসনত।
আানহাতে ১ বজালৈকে মাত্ৰ ৬ খন আসন হে লীড কৰিব পাৰিছে আম আদমী পাৰ্টিয়ে।
আাৰু ৩ খন আসনত আগুৱাই আছে অন্যান্য দলৰ প্ৰাৰ্থী।
উল্লেখ্য যে গুজৰাট বিধান সভাৰ নিৰ্বাচনত কংগ্ৰেছ আৰু আম আদমী পাৰ্টি এই তিনিওটা দলেই হাড়ক পানী কৰি কৰিছিল নিৰ্বাচনী প্ৰচাৰ। বিৰোধীৰ শক্তিশালী প্ৰচাৰত শংকিত হৈ পৰিছিল বিজেপি। যাৰ বাবে দেশৰ চুকে কোণে থকা সকলো ৰথী মহাৰথী বিজেপি নেতাক নমোৱা হৈছিল গুজৰাট বিধান সভাৰ নিৰ্বাচনী প্ৰচাৰত।
গুজৰাটত ভাল ফলাফলৰ আশা কৰিছিল ৰাহুল গান্ধী আৰু কেজৰিৱালে। সংবাদ মাধ্যমতো এই দুই বিৰোধীয়ে বিজেপিক আঁতৰাই নিজৰ চৰকাৰ প্ৰতিষ্ঠা কৰাৰ কথা বীৰদৰ্পে ঘোষণা কৰিছিল। পিছে হৈ থকা ভোট গণনাৰ গতি বিধিয়ে চেঁচা পানী ঢালিছে দুই বিৰোধী ৰাহুল আৰু কেজৰিৱাল বাহিনীৰ আশাত।
যি কি নকওক গুজৰাটৰ লগতে হিমাচলত হৈ থকা বিধান সভাৰ নিৰ্বাচনৰ ভোট গণনাত আগবাঢ়ি আছে কংগ্ৰেছ। গুজৰাটক লৈ দুখী হ’লেও হিমাচলৰ ফলাফলক লৈ সুখী হৈ পৰিছে ৰাহুল। ঠিক তেনেদৰে কোনো এখন ৰাজ্যত ভাল ফলাফল দেখুৱাব নোৱাৰিলেও বুধবাৰে দিল্লী পৌৰ সভাৰ নিৰ্বাচনত ১৫ বছৰীয়া বিজেপিক আঁতৰাই আপে পৌৰ সভা দখল কৰে। এতিয়া সেই সুখতেই শান্তনা লৈছে অৰবিন্দ কেজৰিৱালে।