ক’ৰ’নাৰ সংক্ৰমণ হ্ৰাসৰ বাবে চৰকাৰে ঘোষণা কৰা ল’কডাউনৰ ফলত ৰাজ্যৰ শিক্ষাৰ্থী সমাজ ক্ষতিগ্ৰস্ত হৈছে।
ছাত্ৰ-ছাত্ৰীৰ পাঠদানত ব্যাহত নহবলৈ চৰকাৰে-প্ৰশাসনে গ্ৰহণ কৰা অনলাইন শিক্ষাপদ্ধতিৰ সিদ্ধান্তৰ প্ৰতি সন্মান জনাই নলবাৰী জিলাৰ একাংশ শিক্ষক-শিক্ষয়িত্ৰীয়ে অ’নলাইন আৰু ফোন কৰি পাঠদান কাৰ্যসূচী অব্যাহত ৰখাৰ সময়তে নলবাৰী জিলাৰ এগৰাকী ছাত্ৰনেতা, তেখেতৰ শিক্ষক পিতৃ আৰু আন এগৰাকী শিক্ষকে ছাত্ৰ-ছাত্ৰী সকলৰ সুবিধাৰ্থে এক ব্যতিক্ৰমী পদক্ষেপ গ্ৰহণ কৰিছে ।
সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক সদস্য ভৱজিৎ বেজবৰুৱাই পিতৃ ব্ৰজালক্ষ্মী এম. ই . স্কুলৰ শিক্ষক কমলা কান্ত শিল আৰু নম-শূদ্ৰ প্ৰাথমিক বিদ্যালয়ৰ শিক্ষক নগেন বৰ্মনেৰে মিলি নিজ গাঁও উদয়পুৰত কেইবা গৰাকী ছাত্র- ছাত্ৰীক শিক্ষাদান কৰি আছে।
শিক্ষাগ্ৰহণ কৰিবলৈ অহা ছাত্ৰ-ছাত্ৰী সকলক প্ৰশাসনে বান্ধি দিয়া নিয়ম অনুসাৰে সম্পূৰ্ণৰূপে সামাজিক দূৰত্ব বজায় ৰাখি হাত ধোৱাই, ছেনিটাইজ কৰিহে আসন গ্ৰহণ কৰিবলৈ দিয়া হয়।
প্ৰশাসনৰ নীতি-নিয়ম মানি নিজৰ ঘৰৰ সন্মুখৰ নিৰিবিলি স্থানত গাঁও খনৰ ছাত্র- ছাত্ৰী সকলক একগোট কৰি শিক্ষাৰ্থী সকলক অধ্যয়নৰ প্ৰতি আগ্ৰহী কৰি তোলাৰ প্ৰচেষ্টা অব্যাহত ৰাখিছে ছাত্ৰনেতা গৰাকীয়ে।
লক্ষণীয় কথা এয়ে যে, একাংশ শিক্ষক-শিক্ষয়িত্ৰীয়ে অনলাইন যোগে পাঠদান কাৰ্যসূচী ৰূপায়ন কৰি আহিছে যদিও গ্ৰাম্যাঞ্চলৰ বহু পৰিয়ালৰ ছাত্ৰ-ছাত্ৰীৰ গৃহত স্মাৰ্ট ফোন নথকাৰ প্ৰতি লক্ষ্য ৰাখি ছাত্র নেতা গৰাকীয়ে লোৱা এনে পদক্ষেপক অভিভাৱক তথা অঞ্চলটোৰ ৰাইজে ভূয়সী প্ৰশংসা কৰিছে।
